İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 115 Hüküm no: 63 Orijinal metin no: [32-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fenerkapısı iskelesinde mevcut olan kantarlar yetersiz olduğundan ilave kantar yapılması Fenerkapısı İskelesi’ne vaz‘ olunan çeki Ma‘rûz, Vârid olan fermân-ı âlîye imtisâlen hâmiş-i arzuhâlde olan i‘lâma nazar olundukda Fenerkapısı iskelesine yetmiş altı senesinde bâ-fermân-ı âlî dört çeki vaz‘ olunup onların dahi birisi şikest ve amel-mânde olmağla üç çekiye münhasır kalıp ve aslında mahâll-i mezkûrda yedi aded taş çeki olmağla şimdi üç çeki kifâyet etmediği muharrer ve dört aded çekiye dahi muhtâc olduğunu Gümrük Emîni i‘lâm etmekle ihtiyâten mahâll-i mezkûra kıbel-i şer‘-i şerîfden Kâtib Numan Efendi irsâl, ol dahi ümenâ-yı şer‘le mahâll-i mezkûra varıp etrâfında ehl-i İslâmdan Ali Efendi b. Mustafa ve Mehmed Said Ağa b. Ömer ve Ali Ağa b. Ahmed ve İbrahim b. Ebubekir ve Ahmed b. Abdullah ve Turşucu Mustafa Çelebi ve es-Seyyid Mehmed ve diğer Ahmed Beşe ve Osman b. Yusuf ve Ali b. Süleyman ve Kemerci el-Hâc Osman Ağa ve Kemerci Ahmed Beşe ve Mühürcü Hüseyin Beşe iskele-i mezbûre kayıkçılarından Kethüdâ İbrahim ve Hasan ve Ali ve diğer Ali ve Hüseyin ve Ahmed ve rüesâ tâifesinden el-Hâc İbrahim ve İbrahim Beşe ve Mustafa ve Ahmed ve Musa Molla Ahmed ve Ali Halil ve Küçük Ali nâm kimesneler ile zimmî tâifesinden Tarandafil ve Yanaki ve Aleksi ve Bahar ve Lefter ve Yorgo ve Kömürcü Simon ve Todoş ve Hürmüz ve Zafiri ve Panayot ve Londari ve sâir yirmi beş nefer mazbûtü’l-esâmi kimesneler hakīkat-i hâl minvâl-i meşrûh üzere olup iskele-i mezbûrede hatab nakil olunur kebîr konaklar ekser olmağla odun kayıkları ziyâde yanaşıp def‘-i mezâhim-i nâssa mevcûd çekiler kifâyet etmemekle Topçubaşı Ağa ma‘rifetiyle şikest olan bir aded çeki tebdîl ve üçü dahi ayâr olunup ve müceddeden mahâll-i mezkûra üç çeki daha vaz‘ olunmasını istid‘â eylediklerini mezbûr dâ‘îleri gelip inhâ eylediği ma‘lûm-ı devletleri buyruldukda emr ü fermân hazret-i men-lehü’l-emrindir. Fî 22 Zilka‘de sene 1179.