İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 116 Hüküm no: 64 Orijinal metin no: [32-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ezigel v. Ohan’ın Tavukpazarı’ndaki kürkçü dükkânında olan eşyayı Kürkçü Yorgaki’ye teslim etmesi Kürkçü gediği Tavukpazarı’nda vâki‘ Ma‘rûz, Hâmil-i arzuhâlin hasmı Tavukpazarı’nda Kürkçü Yorgaki v. Mosi mahmiye-i İslambol’da meclis-i şer‘-i hatîrde Tavukpazarı Kürkçüleri dükkânlarından Sirozî nâm hatunun tasarrufunda olan ma‘lûmü’l-hudûd dükkânında mevcûd zikri âtî eşyâya vâzı‘ü’l-yed olan hâmil-i arzuhâl Rezikel v. Ohan muvâcehesinde dükkân-ı merkūmda mevcûd beynimizde gedik ta‘bîr olunur bir minder ve bir sandık ve içinde iki kafa zağrası ve iki tulum yalancı kākum ve bir tulum sincab kürk gāib ani’l-meclis Aklino v. Merkiya v. Kostanti nâm zimmînin mülkü olmağla bin yüz yetmiş yedi senesi Muharremi’nin yirmi beşinci günü Mahmudpaşa’da vâki‘ handa lonca mahâllinde bana iki yüz elli guruş semen-i medfû‘a bilâ-şart ve lâ-tağrîr bey‘ ü teslîm, ben dahi tesellüm ve kabûl edip mülk-i müşterâm olmuş iken merkūm Rezikel bi-gayrı hakkın vaz‘-ı yed eder deyü da‘vâ merkūm Rezikel cevâbında eşyâ-yı mezkûreyi mâliki merkūm Aklino işbu [33] Şevvâl-i şerîfin yirmi altıncı günü Mahmudpaşa Mahkemesi’nde işbu yedimde olan mübâya‘a hücceti mantûkunca bana üç yüz guruş semen-i makbûza bey‘ ve teslîm etmiş idi deyü vaz‘-ı yedini ikrâr ve bey‘-i evveli inkâr etmeğin müdde‘î-i merkūm Yorgaki bey‘-i evvel-i mezkûru udûl-i millet-i Nasârâdan olduklarını lede’t-tezkiye Müslimînden istihbâr olunan mahâll-i mezkûrda Kürkçü Yanaki v. Yorgi v. Petro ve Todori v. Yani ve Anderya v. Manol ve Yorgi v. Yuvan ve Sanan v. Yani nâm zimmîler şehâdetleriyle isbât etmeğin mûcebiyle eşyâ-yı mezkûreden kasr-ı yed ve müdde‘î-i merkūma teslîme mesfûr Ezigel’e tenbîh olunduğu bi’l-iltimâs huzûr-ı âlîlerine i‘lâm olundu. Fî 23 Ra sene 1179.