İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 117 Hüküm no: 65 Orijinal metin no: [33-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kırkçeşme suyu kaynağına yakın İvazderesi’ne yapılacak bend için Filköprüsü’nden taş taşıyacak arabacıların fiyatlarının belirlenmesi Bend-i cedîde Fil Köprüsü’nden taş nakline, fî-i beher zirâ‘ 50 guruş. Âsâr-ı azîme-i celîle ve hayrât-ı câriye-i cezîle-i hazret-i cihândârî olmak üzere mahmiye-i İstanbul’da câriye miyâh-ı azbeden Kırkçeşme suyu ta‘bîr olunan mâ-i lezîzin tevfîr ve teksîri irâde-i hayriyesiyle menba‘ına karîb İvazderesi nâm mahâlde binâsına mübâşeret olunan bendin levâzım-ı binâsından olup hâlâ Filköprüsü’nda i‘dâd ve ihzâr kılınan ahcârın nakli için İstanbul’da mevcûd bulunan arabacıların nakliyeleri fiâtı kırk iki târîhinde binâ olunan sedde taş nakil eden arabalara verilen otuz iki şer akçe yevmiyeye kıyâs ile olmayıp ecr-i misiller mikdâr-ı fîleri rızâlarıyla vaz‘ ve pazarları eyyâm-ı adâlet irtisâm-ı hazret-i hüdâvendigārîde ma‘rifet-i şer‘le kat‘ olunmak münâsib görülmekle sa‘âdetlü defterdâr efendi telhîsiyle fazîletlü İstanbul kādısı efendi ve hâslar nâibi efendiye hitâben vech-i meşrûh üzere husûl-pezîr olması için emr-i âlî sâdır olmağla imtisâlen-leh izzetlü yeniçeri ağası ma‘rifetiyle arabacılar kethüdâsı ve İstanbul’da mevcûd arabacılardan müte‘addid araba sâhibi olan cerîdede isimleri mazbût yirmi iki nefer kimesne meclis-i şer‘-i şerîfe ihzâr ve binâ emîni sa‘âdetlü Çavuşbaşı Ağa tarafından vekîl-i müseccelleri Ömer Ağa hazır olduğu hâlde mazmûn-ı emr-i âlî tefhîm ve Edirne ve âhar mahâllere ol makūle nakl-i ahmâl eden arabaların kirâlarına kıyâs ile âhar misilleri ta‘yîn ve kendileri ilzâm ve tefhîm olundukda her zirâ‘ına ellişer akçe ücret-i nakliye verilmesini niyâzında olmalarıyla ashâb-ı vukūfdan dahi istihbâr olundukda bu sûretde tarafeyn mağbûn olmayacağı mütehakkık olmağla mezbûr arabacılar sâlifü’l-beyan Fil Köprüsü’nden bend-i cedîd mahâlli olan İvaz Deresi’ne her zirâ‘ını ellişer akçeye ücret ile ahcâr-ı mezkûreyi arabalarına tahmîl ve nakle ta‘ahhüdleri tescîl ve bin yüz yetmiş dokuz senesi Zilka‘desi’nin yirminci erba‘a günü şürû‘ edeceklerini hâlâ İstanbul kādısı fazîletlü Mehmed Hamid Efendi hazretleri i‘lâm etmeğin işbu i‘lâmının mazmûn ve şurûtu düstûrü’l-amel tutulmak için Başmuhâsebe’ye kayd ve sûret ve bu emr-i mühimmin ve hatırın temşiyet ve nizâmına fî-mâ-ba‘d dahi ihtimâm eylemeleri için Efendi’yi mûmâ-ileyh tarafına ilmühaberi verilmek bâbında fermân-ı âlî sâdır olmağın mûcebince kaydolunup sûret verilmek ile efendi-i mûmâ-ileyh tarafına işbu ilmühaber kāimesi verildi. Fî 24 Za sene 1179.