İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 126 Hüküm no: 78 Orijinal metin no: [38-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Mehmed’in vefat eden Mehmed b. Veli’den satın aldığı kuruyemişci dükkânı gediğini varisi olan küçük oğlu Mustafa’ya iade etmesi Kuruyemişçi gediği Ma‘rûz, Mahmiye-i İstanbul’da Küçükpazar’da sâkin iken yedi ay mukaddem vefât eden Kuruyemişçi Mehmed b. Veli b. Osman nâm kimesnenin verese-i münhasırasından zevcesi olup kendi tarafından asâleten ve sagīr oğlu Mustafa’nın vasiyy-i mansûbesi olmağla vesâyeten Rikâb-ı müstetâba arzuhâl eden mu‘arrefetü’z-zât Hafize bt. Halil meclis-i şer‘-i şerîfde Yemiş İskelesi’nde Yoğurtçular Sokağı nâm mahâlde vâki‘ mahzende mevcûd zikri âtî eşyâya vâzı‘ü’l-yed olan arzuhâlinde mezkûr el-Hâc Mustafa b. Mehmed mahzarında mûrisimiz müteveffâ-yı mezbûrun ile’l-vefât sâkin olduğu mahzen-i mezkûrda mevcûd yemişçi gediği ta‘bîr olunur iki iskemle ve bir kantar ve bir yağ kesmesi ve bir dolap ve bir destgâh mülkü ve ba‘de’l-vefât semeni bana ve seb‘a-i esmânı vasîsi olduğum oğlum sagīr-i mezbûra intikāl etmişken mezbûr el-Hâc Mustafa bi-gayrı hakkın vaz‘-ı yeddir deyü da‘vâ ve mezbûr el-Hâc Mustafa dahi cevâbında müdde‘iye-i mezbûrenin mûrisi mezbûr Mehmed eşyâ-yı mezkûreyi fevtinden beş ay mukaddem bana iki yüz guruş semen-i makbûza bey‘ ve teslîm etmekle ancak vaz‘-ı yed ederim deyü def‘i sâbit ve mütehakkık oldukdan sonra bâ-vesâtet-i müslimîn sagīr-i mezbûra merhameten rızâsıyla alâ-tarîkı’l-ikāle eşyâ-yı mezkûreyi vasiyy-i mezbûreye teslîm ve mutâlebesinden gerek vasiyy-i mezbûrenin ve gerek sagīr-i mezbûrun zimmetlerini ibrâ ve bu vechile kat‘-ı nizâ‘ eyledikleri mübâşiri Ahmed Çavuş kulları iltimâsıyla huzûr-ı âlîlerine i‘lâm olundu. Fî 28 Za sene [11]79.