İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 126 Hüküm no: 79 Orijinal metin no: [38-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Katırcıoğlu Mehmed’in vefat eden Osman’ın varisleri aleyhindeki diş ve diyet davasından vazgeçmesi Diş, diyet ve sâire müte‘allık da‘vâdan ibrâ. Ma‘rûz, Gemlik kazâsına tâbi‘ Armudlu karyesi ahâlîsinden olup vech-i âtî üzere maklû‘u’l-esnân olan Katırcıoğlu demekle ma‘rûf Mehmed b. Hüseyin Çarşamba günü arz odasında huzûr-ı âlîlerinde akdolunan meclis-i şer‘-i hatîrde karye-i mezbûre ahâlîsinden olup beş sene mukaddem vefât eden es-Seyyid el-Hâc Osman b. Mehmed’in verese-i münhasırası olmağla terekesine vaz‘-ı yedleri mütehakkık olan sulbiye kebîre kızlarından Afîfe nâm hatun tarafından husûs-ı âti’z-zikrde vekîl-i sâbitetü’l-vekâlesi zevci es-Seyyid Halil ve Nefise nâm hatun tarafından kezâlik vekîli [39] zevci es-Seyyid İbrahim ve sulbî kebîr oğlu Mehmed Emin mahzarlarında mezbûrûnun mûrisleri mezbûr el-Hâc Osman hayâtında fevtinden üç sene mukaddem karye-i mezbûrede beni bir husûs için mütevellî tomrukuna vaz‘ etdirdiği esnâda yumruk ile ağzıma darb ve hanek-i a‘lâsından seniyye ta‘bîr olunur iki ön dişimi ve rubâ‘iye ta‘bîr olunur bir dişimi ve hanek-i esfelinden dahi kezâlik seniyye ta‘bîr olunur bir dişimi ki cem‘an dört dişimi çıkarıp lâkin mezbûr el-Hâc Osman’ın ağzında zikr olunan dişlerin emsâli mevcûd olmamağla diyet lâzım gelmiş iken kable’l-edâ fevt olup zimmetinde kalmağla işbu yedimde olan fetvâ-yı şerîfe mûcebince dişlerimin mecmû‘-ı diyeti olan gümüşden iki bin dirhemi hâlâ terekesinden taleb ederim deyü müdde‘âsına ikāmet-i beyyineden izhâr-ı acz ve mezbûr Mehmed Emin’i adem-i ilmine istihlâf etdikde ol dahi yemînden nükûl ve müvekkilân-ı mezbûretânın tahlîflerine tevkīf olunmuş idi. Hâlâ mezbûr Mehmed dâ‘îhâneye gelip zikr olunan vekîller ile mezbûr Mehmed Emin huzûrlarında bâ-vesâtet-i müslimîn doksan guruş bedel-i makbûza sulh olup zikr olunan dişlerinin diyetine müte‘allıka âmme-i de‘âvîden gerek mezbûr Mehmed Emin’in ve gerek müvekkiletân-ı mezbûretân Afife ve Nefise’nin zimmetlerini ibrâ-i âm ile ibrâ ve iskāt etdikde onlar dahi ibrâsını kabûl ve husûs-ı mezkûr için kat‘-ı nizâ‘ eyledikleri bi’l-iltimâs huzûr-ı âlîlerine i‘lâm olundu. Fî 28 Za sene 1179.