İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 133 Hüküm no: 89 Orijinal metin no: [42-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ramazan ve Yahya’nın Ahmed Kaptan’daki alacaklarının varislerine ödenmesi Ahmed Kapudan’a hüküm, 1626 [guruş] Ma‘rûz, Magāribe’den olup mahmiye-i İslambol’da Tahtakale kurbünde fesçi iken bundan akdem vefât eden el-Hâc Ramazan b. Mehmed b. Abdullah’ın verese-i münhasırası olup mahmiye-i mezbûrede sâkine zevce-i menkûhası Fâtıma ile vilâyetinde sâkine zevce-i uhrâsı Selime’ye ve sulbiye kebîre kızları Temûme ve li-ebeveyn karındaşı Salih ve li-ebeveyn karındaşı Mesud’a ve yine tâife-i mezbûreden olup müteveffâ-yı mezbûrdan sonra fevt olan el-Hâc Yahya b. el-mezbûr Mehmed’in verese-i münhasırası olup vilâyetinde sâkine zevce-i menkûhası Saliha ve sulbî kebîr oğulları el-Hâc Mehmed ve Osman ve Selim ve kızı Hadîce’nin vasiyy-i muhtârları el-Hâc Yahya b. Ahmed tarafından husûs-ı âti’z-zikrde bâ-hüccet-i şer‘iyye vekâleti sâbit vekîli olan mezbûr el-Hâc Mehmed Çarşamba günü Dîvân-ı âlî’de ma‘kūd meclis-i şer‘-i şerîfde arzuhâl eden Ahmed Kapudan b. Ahmed mahzarında işbu yedimde olup bin yüz altmış iki Cemâziyelâhiresi târîhiyle müverrah temessük mantûkunca mezbûr Ahmed Kapudan şerîki olan gāib ani’l-beled Ömer nâm kimesne ile müteveffâ-yı mezbûr el-Hâc Ramazan’dan iştirâ ve kabz ve birbirlerinin zimmetlerine lâzım gelen semene kefil oldukları eşyâ semeninden bâkī beş yüz kırk guruş kable’l-ahz mezbûr el-Hâc Ramazan fevt olup müvekkil-i mezbûrun vasîsi olduğu verese-i mezbûresine isâbet etmekle meblağ-ı bâkī beş yüz kırk guruş ile yine işbu yedimde olan yetmiş iki Şevvâli târîhiyle müverrah temessük mantûkunca mezbûr el-Hâc Yahya’dan dahi kezâlik iştirâ eyledikleri eşyâ semeninden olan üç bin dokuz yüz altmış üç buçuk guruşun iki bin üç yüz yirmi yedi buçuk guruşunu hayâtında mezbûr el-Hâc Yahya’ya edâ ve bin altı yüz yirmi altı guruşunu kable’l-ahz [43] mezbûr el-Hâc Yahya dahi vefât edip veresesi mezbûrûna mevrûs olmağla bi’l-vekâle taleb ederim deyü ba‘de’d-da‘vâ ve’l-istintâk mezbûr Ahmed Kapudan cevâbında evvelâ müteveffâ-yı mezbûr el-Hâc Ramazan’a beşyüz kırk guruş cihet-i mezbûreden deyni bâkī kaldığını ikrâr u i‘tirâf edip ve sâniyen müteveffâ-yı mezbûr el-Hâc Yahya’ya dahi asâleten ve kefâleten üç bin dokuz yüz yetmiş üç buçuk guruş deyni olduğunu ikrâr lâkin ve kefil-i mezbûrun kabzını mu‘terif olduğu iki bin üç yüz kırk yedi buçuk guruşdan mâ‘adâ iddi‘â eylediği bin altı yüz yirmi altı guruşu dahi şerîkim mezbûr Ömer ile ma‘an bi’d-defa‘ât teslîm ve edâ eyledik deyü def‘ine ikāmet-i beyyine edemeyip vekîl-i mezbûr el-Hâc Mehmed müteveffâ-yı mezbûr el-Hâc Yahya’nın oğlu olmağla adem-i ilmine tahlîf etmeğin verese-i sâiresi mezbûrûnun adem-i ilmlerine tahlîf olunmağa mevkūfen bin altı yüz yirmi iki guruş dahi mezbûr Ahmed Kapudan’dan şer‘an lâzım gelmeğin deyn-i evvel-i merkūm beş yüz kırk guruş ile deyn-i sânî bin altı yüz yirmi altı guruşun edâlarıyla mezbûr Ahmed Kapudan şer‘an ilzâm olduğu mübâşiri iltimâsıyla huzûr-ı âlîlerine i‘lâm olundu. Fî 4 Zilhicce sene 1179.