İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 134 Hüküm no: 90 Orijinal metin no: [43-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukıye bt. Mustafa tarafından Veliyüddin b. Ahmed aleyhine ikame olunan duvar ve arsa davasında anlaşma sağlanması Keşf-i menzil kurb-ı Hazret-i Halid der-mahalle-i Düğmeciler Ma‘rûz, Sâdır olan fermân-ı âlîlerine imtisâlen savb-ı şer‘-i şerîf-i enverden bi’l-iltimâs irsâl olunan müderrisîn-i kirâmdan es-Seyyid Halil Efendi dâ‘îleri ve Evkāf müfettişi mevâlî-i izâmdan Muradzâde es-Seyyid Ahmed Efendi tarafından mürsel Hayrullah Efendi dâ‘îleri hâssa mi‘mârlarından Abdullah ve es-Seyyid İsmail Halîfeler ve sâir ümenâ-yı şer‘le medîne-i Ebâ Eyyûb Ensârî -aleyhi rahmetü’l-bârîde- Düğmeciler mahâllesinde vâki‘ nezâret-i dâ‘îlerinde olan evkāfdan Kāmetîzâde Mehmed Efendi Vakfı’ndan arzuhâlde mezkûr Bostanî Veliyüddin b. Ahmed müceddeden binâ eylediği menzile varıp huzûr-ı Müslimînde akdeyledikleri meclis-i şer‘-i kavîmde menzil-i mezkûr ittisâlinde vâki‘ nezâret-i hazret-i Şeyhülislâmîde olan evkāfdan Reis Mustafa Efendi Vakfı’ndan bir bâb menzile mutasarrıf olan sâhibe-i arzuhâl Rukıye Hatun bt. Mustafa Efendi tarafından husûs-ı âti’z-zikrde vekîl olduğu zâtını ârifân Za‘îm Mehmed Ağa ve es-Seyyid Osman nâm kimesneler şehâdetleriyle sâbit olan el-Hacce Hanife bt. Mehmed mezbûr Veli b. Ahmed müvekkilem mezbûrenin menzili beyninde olan duvarı üzerine tahta-pûş cüzû‘unu bi-gayrı hakkın vaz‘ eylediğinden mâ‘adâ havlusu vasatından tarîk-i âmma gelince arzen on sekiz parmak ve tûlen on bir zirâ‘ ve terbî‘an sekiz zirâ‘ ve altı parmak arsa üzerinde mebnâ duvarımı hedm ve arsasını dahi gasb etmişdir, zikr olunan tahta-pûş cüzû‘unu ref‘ ve arsa-i merkūmeden keff-i yed eylesin deyü eylediği duvar arsası da‘vâsından bâ-vesâtet-i Müslimîn fâriğā olup husûs-ı mezkûra müte‘allıka da‘vâdan mezbûr Veli’nin zimmetini bi’l-vekâle ibrâ etdikde mezbûr Veli dahi rızâsıyla duvar-ı mezkûr üzerine vaz‘ eylediği cüzû‘unu ref‘ ve yerine rızâsıyla mezbûre Rukıye’nin makarr-ı nisvân olan mevâzi‘ini görmeyinceye dek havâle vaz‘ etmek üzere ta‘ahhüd ve duvar-ı mezkûrun arsası benimdir deyü tasaddî eylediği da‘vâdan mezbûre Rukıye’nin zimmetini kezâlik ibrâ ve iskāt etmekle her biri âharın ibrâsını kabûl ve mütevellîler dahi bu minvâl üzere re’y etmeleriyle kat‘-ı nizâ‘ eylediklerini mezbûrlar dâ‘îleri mahâllinde tahrîr ve gelip inhâ eyledikleri huzûr-ı âlîlerine i‘lâm olundu. Fî 27 Zilka‘de sene 1179.