İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 139 Hüküm no: 96 Orijinal metin no: [46-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyar olarak ve dükkânlarda Mısır’dan gelen hasırları satan esnafın kanun ve nizama bağlanması Mısır hasır bey‘ eden tâife nizâmı Ma‘rûz, Mahmiye-i İslambol’da Mısrî hasır bey‘ eden tâifeden ayakda hasır gezdirenlerden Mustafa b. Ömer ve Abdurrahman b. Hasan ve es-Seyyid Osman b. Mehmed ve Abdülfettah b. Fettah ve Mehmed b. Fettah ve es-Seyyid Ahmed b. es-Seyyid Musa ve Abdülkerim b. Ahmed ve Ahmed b. Ata ve Hüseyin b. Ahmed ve Mustafa b. Ahmed ve el-Hâc Ali b. Mehmed ve Süleyman b. Selim ve Ahmed b. Mehmed ve Mustafa b. Abdullah ve es-Seyyid el-Hâc Ahmed b. Hasan ve Ahmed b. Süleyman ve Abdullah b. Mehmed ve Ali b. Ali ve Selim b. Abdülfettah nâm yirmi nefer kimesneler şer‘-i şerîfde Balkapanı köşesinden Kitapçılar sûkuna varınca dükkânda olan ustalarından kethüdâları el-Hâc Mehmed b. Abdullah ve Yiğitbaşıları İbrahim Çelebi b. el-Hâc Mansur ve Halil Çelebi b. Mehmed ve Abdullah Usta b. Hüseyin ve el-Hâc Mehmed b. Hicâzî ve Amir b. Yunus ve el-Hâc Halil b. Mehmed ve Salim b. Selim ve es-Seyyid Mustafa b. Abdülfettah ve el-Hâc Ali b. Abdullah ve el-Hâc Süleyman b. Hüseyin ve el-Hâc Ahmed b. Mehmed ve Halil b. el-Hâc Mehmed ve el-Hâc İbrahim b. Mehmed ve Atiye b. Hızır ve es-Seyyid Said b. Ahmed ve es-Seyyid Mehmed b. Mehmed ve el-Hâc Mehmed b. el-Hâc Mehmed ve Abbas b. Ali nâm yirmi bir nefer kimesneler ile terâfu‘larında ez-kadîm nizâmımız yirmi bir nefer usta ve yirmi nefer dahi ayakda hasır gezdiren kimesnelere mahsûs ve yedimizde olan fermân-ı âlîşânda tasrîh olunduğu vech üzere hırfetimize ecânibden kimesne müdâhale etmeyip dükkânda oturanlardan biri bilâ-veled fevt oldukda bizim içimizden eski ve ihtiyârı dükkânına vaz‘ olunmak beynimizde mer‘î ve mu‘teber olup lâkin Mısır’dan gelen hasırları mezbûrûn müstakillen kendileri zabt ve bize hisse vermeyip kâr ü kisbimize mâni‘ olmalarıyla biz dahi hisse talebinde olduğumuzda beynimizde ba‘de-vukū‘i’l-münâza‘a beynimiz tevfîk olunup ba‘de-hâzâ gelen hasırlar otuz bir hisse i‘tibârıyla yirmi bir hissesini zikr olunan dükkânlarda oturan yirmi bir nefer ustalar alıp ve on hissesini dahi biz alıp beynimizde taksîm etmek üzere kavl ve ittifâk ve ahd ü mîsâk ve hilâfına hareket ederimiz olursa gereği gibi te‘dîb olunmağa râzı olduğumuzdan mâ‘adâ işbu hâzirûn bi’l-meclis ayakda hasır gezdirip satmak irâdesinde olan es-Seyyid Abdülkadir ve es-Seyyid Abdullah ve es-Seyyid Halil ve Mehmed b. Şaban nâm kimesneler dahi hirfetimizden olup lâkin mezbûrûn dahi idhâl olunduğu sûretde yirmi neferden ziyâde olup nizâm-ı kadîmimize mugāyir ve fermân-ı âlîşâna muhâlif olmağla birimiz vefât etdikde evvelâ mezbûr Abdülkadir ve ba‘dehû ale’t-tertîb mezbûrûn dahi hirfetimize idhâl olunmak üzere taht-ı nizâmımıza ifrâğ olunmağla fî-mâ-ba‘d bu şurût-ı nizâmımız düstûrü’l-amel tutulmak için fermân-ı âlîşân sudûrunu istid‘â ederiz deyü takrîr ve iltimâslarını mezbûrûndan her biri tasdîk ve tahkīk eyledikleri huzûr-ı âlîlerine i‘lâm olundu. Fî 6 Zilhicce sene 1179.