İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 140 Hüküm no: 97 Orijinal metin no: [46-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Unkapanı’nda yanmış olan ekmekçiler loncası binasının belirtilen ölçüler dairesinde yeniden inşa olunması Habbâzâna mahsûs lonca mahâlli keşfi, Bâ-sah, Mahall-i mezbûr sâir mahâllere kıyâs olmayıp lüzûmu olduğuna binâen i‘lâmı mûcebince sâire sirâyet etmemek şartıyla on iki zirâ‘ kad ile binâsına mümâna‘at olunmayıp bir parmak ziyâdesine ruhsat gösterilmemek. Keşf der-kurb-ı Kapan-ı dakīk Ma‘rûz, Zikri âtî arsanın mutasarrıfesi Âişe Hatun’un arzuhâlinde sâdır olan fermân-ı âlîlerine imtisâlen kıbel-i şer‘-i şerîf-i enverden irsâl olunan keşif nâibimiz müderrisîn-i kirâmdan es-Seyyid Halil Efendi dâ‘îleri mi‘mâr ağa tarafından kethüdâsı es-Seyyid Mehmed ve es-Seyyid İbrahim Halîfeler ile mahmiye-i İslambol’da Kapan-ı dakīk kapısı hâricinde Tekfurdağı İskelesi’nde Arpa mahzenleri mâbeyninde vâki‘ bir tarafı Zeyneb Hatun tasarrufunda olan yemişçi dükkânı ve bir tarafı Uncu el-Hâc Ali tasarrufunda olan arpa mahzeni ve iki tarafı tarîk-i âm ile mahdûd Ahi Çelebi Vakfı’ndan mezbûre Âişe Hatun tasarrufunda olup işbu bin yüz yetmiş dokuz senesi Ramazan-ı şerîfinin on beşinci günü vâki‘ olan harîkde [47] muhterik olan habbâzânın loncaları ta‘bîr olunur arsa üzerine varıp huzûr-ı Müslimînde akdeylediği meclis-i şer‘-i şerîf-i enverde mi‘mârân-ı mezbûrân misâhalarıyla tûlen on dört buçuk ve arzen altı zirâ‘ ve on dört parmak ve terbî‘an doksan beş zirâ‘ olan parmak geldikden sonra arsa-i merkūmenin mutasarrıfesi mezbûre Âişe Hatun tarafından husûs-ı âti’z-zikrde vekîli es-Seyyid el-Hâc Ahmed işbu arsa-i mezkûrenin fi’l-asl ulyâsında lonca odası ta‘bîr olunur habbâzâna mahsûs bir bâb kebîr oda ve dehliz ve vüstâsında habbâzân tâifesinin zahîre tüccârıyla hesâblarını rü’yet eyleyip akçe teslîm eyledikleri bir bâb kebîr oda ve bir sagīr oda ve kenîf ve bir mikdâr dehliz ve süflâsında bir bâb arpacı mahzeni on altı zirâ‘ kad ile mebnâ olup bu esnâda müvekkilem mezbûre kemâ-fi’l-evvel binâsına mübâşeret murâd etmekle sâbıkı suâl olunmak bi’l-vekâle matlûbumdur dedikde, hakīkat-i hâl ol mahâlde hâzirûn olan Ekmekçiler Kethüdâsı el-Hâc Emin ve Yiğitbaşı Mehmed Said ve Salıcı Molla Osman ve ustalarından Edirneli el-Hâc Ali ve el-Hâc Mahmud ve el-Hâc Mehmed ve Molla Mustafa ve el-Hâc Ali ve el-Hâc Halil ve el-Hâc Ahmed ve es-Seyyid el-Hâc Mustafa ve es-Seyyid el-Hâc Ali ve Hasan Usta ve Mehmed Usta ve diğer Mehmed Usta ve diğer Molla Osman ve diğer Molla Mustafa ve Uncular Kethüdâsı Mehmed ve Yiğitbaşıları Mustafa ve sâir cîrândan olan tüccârdan el-Hâc Mehmed ve Taflıoğlu Salih ve el-Hâc Veliyüddin ve el-Hâc Ahmed ve el-Hâc Süleyman ve es-Seyyid el-Hâc Osman ve el-Hâc Mahmud ve es-Seyyid el-Hâc Mehmed ve Üsküdarî el-Hâc Ömer ve el-Hâc Hüseyin ve el-Hâc Mustafa’dan istihbâr olundukda arsa-i mezkûre üzerinde olan müştemilât-ı mezkûre on altı zirâ‘ kad ile mebnâ iken muhterik olduğunu ve ma‘a’l-müştemilât-ı mezkûre on iki zirâ‘ kad ile binâ olduğu sûretde kimesneye zarârı yokdur deyü her biri ihbâr ve mi‘mârân-ı merkūmân dahi müştemilât-ı mezkûre on iki zirâ‘ kadden noksân ile binâ olunmaz deyü ittifâkan haber verdiklerini mezbûr dâ‘îleri mahâllinde tahrîr ve gelip ümenâ-yı şer‘le inhâ eylediği bi’l-iltimâs huzûr-ı âlîlerine i‘lâm olundu. Fî 5 Zilhicceti’ş-şerîfe sene 1179.