İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 141 Hüküm no: 98 Orijinal metin no: [47-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Belirlenen tarifelerden yüksek fiyatla eşya satan ve ahaliye kaba davranmasından dolayı hapsedilen Bakkal Ömer’in serbest bırakılması Ayasofya’da bakkāl olan Ömer’i mezbûrun kefâletleriyle ıtlâk Ma‘rûz, Sâhibe-i arzuhâlin zevci derkenârda mastûr Ayasofya’da bakkāl Ömer kendisi ve âdemleri narh-ı rûzî üzere eşyâların fürûht etmeyip ve huşûnetle mu‘âmele edip ibâdullahı ızrârları teşekkî birle haber verilmekle bi’d-defa‘ât tenbîh olunup mu‘înlerine istinâden bir vechile mütenebbih olmamağla taraf-ı dâ‘îlerinden ahz ve muhzır ağa kulları hapsine verilip ba‘dehû bu dâ‘îleri i‘lâmıyla te‘dîben on sekiz günden beri Boğazkesen kal‘asına vaz‘ olunmuş idi. Hâlâ sâdır olan fermân-ı âlîlerine imtisâlen salâh-ı nefsi teftîş olundukda dergâh-ı âlî cebecileri ocağından beşinci bölük odabaşısı olup hâlâ Ayasofya’da attâr olan Mehmed b. Hasan ve Başeski Mehmed b. Mustafa ve yine Ayasofya’da Attâr Cafer b. Abdülkerim ve Yusuf b. Ali ve manav diğer Yusuf b. Hüseyin ve Câmeşûycu Ali b. Mehmed nâm kimesnelerden her biri mezbûr Bakkāl Ömer için fî-mâ-ba‘d salâhı zâhirdir ve şimden sonra taraf-ı şer‘-i şerîfden verilen narh-ı rûzîye kendisi ve âdemîsi itâ‘at ve ibâdullahı ızrârdan mücânebet etmek üzere müte‘ahhiddir deyü haber verdiklerinden mâ‘adâ eğer bir dahi hilâf-ı ta‘ahhüd hareketi zuhûr ederse nefsine ve hîn-i mutâlebede ihzârına kefiliz deyü kefilleri tescîl olunmağla ba‘de’l-yevm yine adem-i itâ‘ati ve ibâdullahı ızrârı zâhir olursa Seddülbahr kal‘asında müddet-i medîde habsolunmak şartıyla ıtlâkına müsâ‘ade re’y-i âlîlerine mevkūf olduğu huzûr-ı âlîlerine i‘lâm olundu. Fî 8 Zilhicce sene 1179.