İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 150 Hüküm no: 105 Orijinal metin no: [53-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sürekli fesat çıkaran ve adam öldürme olaylarına karışan Kostanti Dino’nun katlinin meşru olduğu Ma‘rûz, Terkos nâhiyesi kurâsından Arnavud nâm karyeden olup sâdır olan fermân-ı âlîye imtisâlen dâ‘îhânede meclis-i şer‘-i şerîfe ihzâr olunan Kostanti Dino v. Foti’nin keyfiyeti nâhiye-i mezbûrede Tursun nâm karyeden Mustafa b. Osman ve Süleyman b. Mehmed ve Şamlar karyesinden Hüseyin b. İsmail ve Halil b. Mehmed ve Hacıpaşalı karyesinden Ahmed b. Mehmed ve Yassıviran karyesinden Süleyman b. Ahmed ve Filyos karyesinden Osman b. Numan ile mahmiye-i İslambol’da kârhâne yoğurdçularından ashâb-ı arzuhâl Mustafa Beşe ve Ahmed ve el-Hâc İsmail ve Hüseyin Beşe nâm kimesneler merkūm Kostanti Dino için kendi hâlinde olmayıp âlet-i harbile zikr olunan kurâ havâlîsinde geşt ü güzâr ve katl-i nüfûs âdet-i müstemirresi olup hattâ bundan akdem anasını tüfenk ile katleylediğinden mâ‘adâ Yoğurtçular Kethüdâsı Mustafa’nın yanaşması olan es-Seyyid Mehmed’i dahi bir ay mukaddem Terkos nâhiyesinde Çamurludere’de tüfenk ile darb ve katl ve yine yanaşması Dimo nâm zimmîyi on beş gün mukaddem yine Çamurludere’de bıçak ile kolundan darb ve cerh eyledi deyü sû-i hâlini ihbâr ve yedlerinde olup Terkos nâibi İsmail Efendi imzâ ve mührüyle ibrâz eyledikleri i‘lâmda dahi merkūm Dino için nâhiye-i mezbûre ahâlîleri âlet-i harb ile geşt ü güzâr ve katl-i nüfûs âdetidir deyü haber verdikleri tahrîr ve merkūm Dino ibâdullaha muzır ve sâ‘î bi’l-fesâd olduğu ihbâr olunmağla bu makūlelerin emr-i veliyyü’l-emr ile katli meşrû‘ olduğu ma‘lûm-ı devletleri buyruldukda emr ü fermân hazret-i men-lehü’l-emrindir. Fî 6 Zilhicce sene 11179.