İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 151 Hüküm no: 106 Orijinal metin no: [53-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kariye mahallesi Kilisesi Vafkı’na ait arsa ile Kapıcılar Kâtibi Hüseyin Efendi Vakfı’na ait menzil arasındaki arsadan damlalık yeri bırakılması Edirnekapısı dâhilinde Ka‘riye mahâllesinde keşf-i damlalık Ma‘rûz Zikri âtî arsa sâhibi Yanaki zimmînin arzuhâlinde vârid olan fermân-ı âlîye imtisâlen savb-ı şer‘-i şerîf-i enverden irsâl olunan keşif nâibimiz müderrisîn-i kirâmdan es-Seyyid Halil Efendi dâ‘îleri Hâssa mi‘mârlarından Hasan ve Mehmed Emin Halîfeler ve sâir ümenâ-yı şer‘le mahmiye-i İstanbul’da Edirnekapısı dâhilinde Ka‘riye câmi‘i mahâllesinde vâki‘ bir tarafı Kapıcılar Kâtibi Hüseyin Efendi Vakfı’ndan menâzil ve bir tarafı Kasabbaşı Osman Ağa kerîmesi tasarrufunda olan Yağhâne ve bir tarafı Kosta zimmî tasarrufunda olan menzil ve taraf-ı râbi‘i tarîk-i âm ile mahdûd gallesi mahâlle-i mezbûrede vâki‘ kilise fukarâsına meşrûta fi’l-asl zimmîler mütemekkin olduğu mesfûr Yanaki v. Anaştaş tasarrufunda iken muhterik olan arsa üzerine varıp akdeylediği meclis-i şer‘-i şerîfde arsa-i merkūmeye mutasarrıf olan mesfûr Yanaki arsa-i merkūme hudûdunda zikr olunan Kapıcılar Kâtibi Hüseyin Efendi Vakfı’ndan menâzil müstecirlerinden Ali Beşe b. Kasım ve es-Seyyid Ali b. Hasan ve Hadîce bt. Hüseyin muvâcehelerinde <> vakfeyn-i merkūmeyn mütevellîleri hâzıra oldukları hâlde merkūm Yanaki’nin müstecirûn-ı mezbûrûn ile damlalık nizâ‘ları olup ve merkūm Yanaki’nin menzili ile müstecirûn-ı mezbûrûnun menzilleri mâbeyninde mi‘mârân-ı mezbûrân misâhalarıyla arzen on sekiz parmak kadîmîsi üzere damlalık için arsa terk olunmak muktezî olmağla ve tûlen yirmi beş zirâ‘ misâha olunan arsayı damlalık için terk ve ibkā olunmağla her biri râzılar olup ve mütevellîler dahi bu minvâl üzere re’y etmeleriyle kat‘-ı nizâ‘ eylediklerini mezbûr dâ‘îleri mahâllinde tahrîr ve gelip ümenâ ile inhâ eylediği bi’l-iltimâs huzûr-ı âlîlerine i‘lâm olundu. Fî 19 Zilka‘de sene [1]179.