.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 112
Hüküm no: 112
Orijinal metin no: [17b-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Süleyman ve Hüseyin’in evlerini el-Hâc Mustafa’ya sattıkları

Mahmiye-i İstanbul’da Timurtaş Mahallesi’nde Süleyman ve Hüseyin ibney Ali nâm şahıslar mahfil-i şer‘-i hatîr-i lâzımü’t-tevkīrde işbu sâhibü’l-kitâb el-Hâc Mustafa b. İbrahim nâm kimesne muvâcehesinde herbiri ikrâr-ı tâm ve takrîr-i kelâm edip mahalle-i mezbûrda vâki‘ bir tarafdan Hüseyin Çavuş mülkü ve bir tarafdan Mehmed Çelebi mülkü ve bir tarafdan el-Hâc Mustafa mülkü ve bir tarafdan tarîk-i âm ile mahdûd ve mümtâz arsasının kepenekçi Sinan Vakfı’na senede yüz altmış akçe mukāta‘ası olub iki bâb fevkānî beyti ve bir mahzeni ve icâre-i mu‘accele ve yevmî iki akçe ücret-i müeccele ile tasarrufumuzda olan bir bâb mahzeni ve kenîf ve bi’r-i mâyı hâvî mülk menzilimi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mezbûr el-Hâc Mustafa’ya bey‘-i bâtt-ı sahîh-i şer‘î ile iki bin beş yüz riyâlî guruşa bey‘ ve teslîm ol dahi iştirâ ve kabûl eyledikden sonra semen-i mebî‘-i mersûm iki bin beş yüz guruşu yedinden bi’t-tamam ahz u kabz edip menzil-i mersûmda kat‘an alâkam kalmayıp mezbûr el-Hâc Mustafa’nındır, keyfe mâ yeşâ’ ve yehtâr mutasarrıf olsun dedikde kayd şüd.

Fi’t-târîhi’l-mezbûr.

Şuhûdü’l-hâl: el-Hâc Mustafa b. Hasan, Mehmed Çelebi b. el-Hâc Mustafa, el-Hâc Mustafa b. Abdullah, el-Hâc Mustafa b. Ömer, el-Hâc Mustafa b. Abdullah.