İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 155 Hüküm no: 114 Orijinal metin no: [55-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Depremi fırsat bilerek inşaat malzemeleri ile usta ve amele ücretlerine zam yapılmaması hususunda ilgililerin uyarılması Esnâf-ı ebniye ziyâdeye fürûht ve ziyâde ücret taleb eylememek üzere buyruldu. Bâ-sah, İstanbul kādısı fazîletlü efendi, Vukū‘ bulan zelzele takrîbiyle ibâdullahın münhedim olan ebniyeleri beherhâl binâya muhtâc olmakdan nâşî horasan ve kireç ve tuğla ve kiremid ve taş ve envâ‘ kereste ve mismâra ve sâir mevâdd-ı binâya ihtiyâc mevsimidir deyü esnâf edevât-ı mezbûre tama‘-ı hâma teba‘iyet ile bahalarına terakkī kaydında olup dahi [56] ziyâde hasâret-i ibâda tasaddî eylemeleri ihtimâlden ba‘îd olmayıp ve neccâr ve hamamcı ve sâir amele-i binâ dahi ücretlerinin tezâyüdüne sa‘y edecekleri zâhir olup ibâdullahın bu cihetler ile hasârete dûçâr olmalarına rızâ-i hümâyûn-ı hazret-i cihândârî olmadığına binâen o makūle mevâdd-ı ebniyenin bahası ve amelenin ücretleri üzerine bir nesne zam olunmayıp kadîmi üzere bey‘ ü şirâ ve ücret-i mu‘tâde ahz u i‘tâ olunmak bâbında hatt-ı hümâyûn-ı şevket-makrûn şeref-yâfte-i sudûr olduğu cihetden birkaç gün mukaddem bu husûs iktizâ edenlere gereği gibi tenbîh olunmak için Şehremini efendi ile mi‘mâr ağaya hitâben buyruldu ısdâr olunmağla imdi siz dahi mi‘mâr ağa ma‘rifetiyle esnâf-ı mezbûrenin kethüdâlarını getirdip edevât-ı ebniyenin bahaları üzerine bir habbe zam olunmamasını her biri kendi zümresine tenbîh eylemek üzere kethüdâlarına gereği gibi tenbîh ve sırren tefahhus olunup her kim levâzım-ı binânın bahasına ziyâde zam etmiş ise ibreten li’l-gayr cezâsı tertîb olunacağı ve bu takrîbile tuğla ve horasan ve kiremidi kalb ve redî yaparlar ise kezâlik haklarından gelineceğini ifâde ve te’kîd ve amele zümrelerinin kethüdâ makāmında olanlarını dahi getirdip ücret-i mu‘tâde üzerine zam olunmamak husûsunu muhkem tenbîh ve içlerinden mugāyir-i mu‘tâd ücret talebiyle ibâdullahı ta‘cîz edenlerin haklarından gelineceğini ifâde ve bu husûslara dâimâ nezâret ve ihtimâm edip mütenebbih olmayanların ibreten li’l-gayr te’dîblerini i‘lâm ve işbu emr-i ehemde mikdâr-ı zerre iğmâz ve tekâsülden ihtirâz-ı tâm eyleyesin deyü [buyruldu]. Fî 20 Z sene [11]79.