İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 160 Hüküm no: 122 Orijinal metin no: [58-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ali b. Süleyman’ın varislerinin Toloma v. Manol aleyhindeki bağ davasında anlaşma sağlanması Erdek kasabasında on iki dönüm dut bahçesi Ma‘rûz, Galata’ya muzâfe Kapıdağı nâhiyesine tâbi‘ Erdek kasabası ahâlîsinden iken beş sene mukaddem vefât eden Ali Efendi b. el-Hâc Süleyman nâm kimesnenin hasran vârisleri arzuhâl sâhibeleri zevcesi Rukıye bt. Ali ve kebîre kızları Âişe ve Emine zâtları ba‘de’t-ta‘rîfi’ş-şer‘î Çarşamba günü dîvân-ı âlîde ma‘kūd meclis-i şer‘-i şerîfde kasaba-i mezbûre kurbünde Koçkapısı [59] nâm mahâlde etrâf-ı erba‘ası Hacı İmam ve Tolomo ve İstornos bağları ve tarîk-i âm ile mahdûd on iki dönüm dut bahçesine vâzı‘ü’l-yed olan arzuhâlde ve zabt-ı i‘lâmda mezkûrü’l-ism Toloma v. Manol muvâcehesinde mezkûr bahçe mûrisimiz müteveffâ-yı mezbûrun mülkü ve ba‘de’l-vefât bi-tarîkı’r-redd on altı sehim i‘tibârıyla bize mevrûs olmuş iken merkūm Toloma bi-gayrı hakkın vaz‘-ı yed eder deyü da‘vâ, ol dahi cevâbında verese-i mezbûrât bundan akdem Hüseyin b. Hasan nâm kimesneyi taraflarından mezkûr bahçeyi bundan mukaddem mâliki olan Türkmân el-Hâc Ahmed nâm kimesneden da‘vâya ve husûmete tevkîl etmeleriyle ol dahi mezbûr el-Hâc Ahmed’den da‘vâ etdikde ol dahi etdikde ol dahi mûrisleri müteveffâ-yı mezbûr Ali Efendi hayâtında semen-i ma‘lûme bey‘ ve teslîm eylediğini vekîl-i mezbûr muvâcehesinde ba‘de’l-isbât mülk-i müşterâsı olduğuna hükm-i şer‘î lâhık oldukdan sonra bana bey‘ etmiş idi deyü takrîrine mutâbıka ve mümzât ve mahtûme iki kıt‘a hüccet ibrâzıyla ba‘de’d-def‘ ve’l-inkâr merkūm Toloma def‘-i meşrûhunu isbât esnâsında beynlerine Müslimîn tavassut etmekle verese-i mezbûrât merkūm Toloma ile da‘vâ-i meşrûhalarından yüz on guruş üzerine sulh ve yüz on guruşu yedinden bi-kadri’l-hısasi’l-merkūm ahz u kabz edip mezkûr bahçeye müte‘allıka âmme-i da‘vâ ve kâffe-i mutâlebâtdan merkūm Toloma’nın zimmetini ibrâ-i küllî ile ibrâ ve iskāt etdiklerinde ol dahi bedel-i merkūm mutâlebesinden mezbûrât Rukıye ve Âişe ve Âmine’nin zimmetlerini kezâlik ibrâ ve iskāt ve her biri ibrâyı kabûl ve kat‘-ı nizâ‘ eyledikleri tescîl-i şer‘î olunup mübâşiri Mustafa Çavuş kulları iltimâsıyla huzûr-ı âlîlerine i‘lâm olundu. Fî 21 Z sene [11]79.