İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 161 Hüküm no: 124 Orijinal metin no: [59-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hocapaşa Elvanzade mahallesinden sürgün edilen Aşçı Hasan ve eşi Ümmügülsüm’ün mahallelerine geri dönmeleri Aşçı Hasan ve zevcesi mahâlle-i mezbûrede sâkin olmak üzere Ma‘rûz, Hâmiş-i arzuhâlde mastûr derkenârlar nâtık olduğu üzere İstanbul’da Hocapaşa kurbünde Elvanzâde mahâllesinde sâkin Altmışiki Solaklar’ın sâhib-i esâmi yeniçerilerinden Aşçı Hasan ve zevcesi Ümmügülsüm haklarında mahâlle-i mezbûrede olmaz deyü ihrâçlarını müş‘ir câmi‘-i şerîfe iki kıt‘a tezkire bırakılıp mezbûrân Hasan ve zevcesi Ümmügülsüm kendi hâllerinde olmamak töhmetiyle ahz ve bin yüz yetmiş sekiz senesi Saferi’l-hayrı evâsıtında bâ-fermân-ı âlî Tekfurdağı’na nefy ve sene-i mezbûre Rebî‘ülevveli evâhirinde Âsitâne’ye gelmemek şartıyla bâ-fermân-ı âlî ba‘de’l-ıtlâk sene-i mezbûre Rebî‘ülâhiri’nin ikinci günü târîhiyle müverrah sicill-i mahfûzdan muhrec bir kıt‘a i‘lâmda tafsîl olunduğu üzere mezbûrânın kendi hâllerinde olup hilâf-ı şer‘-i şerîf hareket etmemek üzere mahâlle-i mezbûreye ric‘at ve sâkin olmalarına mahâllesi ahâlîsinden i‘lâm-ı mezkûrda mazbûtü’l-esâmi kimesneler râzılar olup lâkin i‘lâm-ı mezkûru mezbûre Ümmügülsüm’ün anası sâhibe-i arzuhâl Fâtıma zâyi‘ etmekle bu def‘a dahi arzuhâliyle sâdır olan fermân-ı âlîlerine imtisâlen mahâllesi ahâlîsinden birkaç nefer kimesneler vech-i âtî üzere mezbûrânın hüsn-i hâllerini ihbâr etmeleriyle bi’t-taharrî bâb kâtiblerimizden Ali Efendi dâ‘îleri ihtimâmen gereği gibi tefahhus için mahâlle-i mezbûreye irsâl olundukda mahâlle-i mezbûre imamı el-Hâc Ali Efendi ve oğlu el-Hâc Mehmed Efendi ve Müezzin es-Seyyid Ahmed Efendi ve ahâlîsinden Silahşor-ı hâssa Kılıç Ali Ağa ve Yeğen Efendi mühürdârı Osman Efendi ve küttâbdan es-Seyyid Mehmed Said Efendi ve Turşucu Abdülkadir ve Maraşî Mehmed Efendi ve Bostanî Ali Ağa ve Bostanî Süleyman Ağa ve Molla Yahya ve İshak Çelebi ve İbrahim Ağa ve eş-Şeyh Ali Efendi ve Saman Emîni Hasan Ağa ve Bostanî Hüseyin Ağa ve civârında sâkin mültezim Hasan Ağa ve Hameleci Hasan Ağa ve Tebdîl Hamlecisi Ali nâm yirmi iki nefer kimesneler mezbûr Aşçı Hasan ve zevcesi mezbûre Ümmügülsüm için altmış beş senesinden beri mahâlle-i mezbûre ahâlîsinden olup kendi hâllerinde ırzlarıyla mukayyed ve bunun emsâli töhmet ile müttehem oldukları yokdur ve töhmet-i mezbûre [60] haklarında iftirâ-i mahzdır deyip mezbûrânın nefslerine ve hîn-i mutâlebede ihzârlarına imam-ı mezbûr Ali Efendi ve Hasan Ağa ve mültezim diğer Hasan Ağa ve Bostanî Süleyman Ağa kefiller olmalarıyla mezbûrân afv ve ıtlâk ve kemâ-fi’l-evvel mahâlle-i mezbûrede sâkin olmalarını iltimâs eylediklerini mezbûr dâ‘îleri mahâllinde tahrîr ve gelip inhâ eyledikleri huzûr-ı âlîlerine i‘lâm olundu. Fî 24 Zilhicce sene 1179.