İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 162 Hüküm no: 125 Orijinal metin no: [60-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Mustafa’nın, Osman b. Mehmed aleyhindeki alacak davasında anlaşma sağlanması Silahdâr Ocağı’nda olan esâmi da‘vâsından ibrâsını isbât. Ma‘rûz, Silahdâr Ocağı neferâtından arzuhâl eden Mehmed b. Mustafa meclis-i şer‘-i hatîrde arzuhâlinde mezkûrü’l-ism Osman b. Mehmed mahzarında mezbûr Osman’a bâ-i‘lâm yüz kırk altı guruş deynim var iken mezbûr Osman bana iki yüz on dört guruş dahi vermekle cem‘an üç yüz altmış guruş deynim için Silahdâr Ocağı’ndan her kıstda altmış ikişer buçuk guruş aldığım esâmemi mezbûr Osman almak üzere kavl edip mezbûr Osman dahi sekiz kıstda esâmemden beşyüz guruş ahz etmekle deyn-i mezkûrdan mâ‘adâ me’hûzu olan yüz kırk guruşu bana versin deyü da‘vâ ve mezbûr Osman cevâbında müdde‘î-i mezbûre deyni olmak üzere beş yüz guruş medfû‘um olup ve hesâb-ı mezkûr üzere esâmesinden ancak yedi kıstda dört yüz otuz yedi buçuk guruş makbûzum olup ve altmış iki buçuk guruş zimmetinde hakkım bâkī kalmağla müdde‘î-i mezbûr Mehmed işbu Şevvâl-i şerîf’in on beşinci günü Soğukçeşme kurbünde Berber İbrahim nâm kimesne’nin dükkânında bana kırk altı guruş verdikde ben dahi ahz edip ziyâde on altı buçuk guruşdan zimmetini ibrâ eylediğimde ol dahi esâmesinden makbûzum olan meblağa ve sâir husûs-ı mezkûra müte‘allıka da‘vâdan benim zimmetimi ibrâ etdikde, ben dahi ibrâsını kabûl etmiş idim deyü ba‘de’d-def‘ ve’l-inkâr mezbûr Osman def‘-i meşrûhunu lede’t-tezkiye udûlden oldukları mahâllerinden ihbâr olunan Haseki kurbünde sâkin İbrahim Çavuş b. Mustafa ve Berber Osman b. Mehmed nâm kimesneler şehâdetleriyle isbât etmeğin mûcebiyle sâhib-i arzuhâl mezbûr Mehmed bî-vech mu‘ârazadan men‘ olunduğu tescîl-i şer‘ olunup bi’l-iltimâs huzûr-ı âlîlerine i‘lâm olundu. Fî 25 Zilhicceti’ş-şerîfe sene 1179.