İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 163 Hüküm no: 126 Orijinal metin no: [60-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fransa tüccarlarının İstanbul’a getirmiş oldukları Frenk kahvesinin satışı için mevcut dükkânlara ilaveten Galata civarında iki dükkâna satış izni verilmesi Frenk kahvesi bey‘ine Galata’da iki dükkân ta‘yîn Ma‘rûz, Fransa tüccârının getirdiği Frengî kahvenin İslambol’da bey‘ine tahsîs kılınan beş dükkân kifâyet etmemekle yedlerinde kırk bin vakiye kahve müctemi‘a olmağla mahzenlerinde nemlenmek havfıyla mezkûr kahveyi taşra iskelelere irsâl yâhud birkaç dükkân daha ta‘yîn olunmak istid‘âsıyla Fransa elçisinin Dîvân-ı âlî’ye ref‘ etdiği arzuhâlin bâlâsında gümrük emîni ve esnâf kethüdâsı ma‘rifetleriyle rü’yet ve iktizâsı üzere i‘lâm eyleyesin deyü bu dâ‘îlerine hitâben sâdır olan fermân-ı âlîye imtisâlen mezkûr arzuhâle nazar olundukda hâmişinde tahrîr olunan sûret-i emr-i âlîşân Fransa tâcirlerinden birinin bin yüz yetmiş yedi Saferi evâilinde Reisülküttâb Numan Efendi i‘lâmıyla yirmi bin vakiye kahvesinin taşraya bey‘ine müsâ‘adeyi nâtık olup lâkin bu âna dek Frenk kahvesinin bâ-emr-i âlî gayrı iskelelere külliyen İslambol’dan nakline ruhsat verildiği olmayıp ve olduğu sûretde dahi ol vesîle ile Yemen kahvesinin taşraya nakilden muhâfazası asîr olup ve yine hâmiş-i arzuhâlde gümrük emîni ağa kulları i‘lâmında attârların takrîrlerinde mezkûr beş dükkândan mâ‘adâ dükkân tahsîsen ve taşra fürûhtuna adem-i müdâhale ve mümâna‘atları beyan olunup ve zümre-i mesfûre mutazarrır olmadan sıyânet olunmaları ahidnâme-i hümâyûnda musarrah olup ve kendilerinin arzuhâllerinde mukaddemâ Frenk kahvesi fürûhtuna tahsîs kılınan beş aded dükkândan mâ‘adâ birkaç dükkân dahi tahsîs veyâhud âhar mahâlle irsâl ile zarârlarının indifâ‘ını tahrîr ve iltimâs etmeleriyle Frengî kahveyi isti‘mâl edenlerin ekserî gemici [61] ve taşralı ve kefere tâifesi olup ve bu makūleler Galata ve etrâfında kesîr olmağla arzuhâllerinde mezkûr ziyâde kahveleri sürülmek için nefs-i Galata’da dahi iki dükkân Frengî kahve fürûhtuna ta‘yîn olunsa hem mesfûrların zarârdan sıyânetine ve hem Yemen kahvesinin adem-i izâ‘atine evfak sûret olduğu ma‘lûm-ı devletleri buyruldukda emr ü fermân hazret-i men-lehü’l-emrindir. Fî 24 Z sene 1179.