İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 164 Hüküm no: 127 Orijinal metin no: [61-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Depremde hasar gören ayakkabıcı dükkânları ile sokak kemerlerinin yangına dayanıklı şekilde inşa olunmaları Saraçhâne kurbünde münhedim olan haffâf hâne kemeri ahşabdan binâ olunmak üzere Ma‘rûz, Bi-emrillâhi te‘âlâ bu def‘a vâkı‘a olan zelzelede Saraçhâne kurbünde vâki‘ sokak kemerleri ve ba‘zı dükkânları münhedim olan haffâfhânenin münhedim olan mahâlleri kemâkân kârgîr binâ olunması irâde buyrulup kemâl-i şefkat ve merhamet-i hazret-i cihândârîden sokak kemerlerinin masrafları taraf-ı hümâyûndan ihsân ve masrafları bu hasâretden masân buyrulmak kasd-ı hayrıyla bu husûsun binâ emîni Hâcegân-ı dîvân-ı hümâyûn’dan Âtıf Efendizâde Ömer Efendi kullarının dûş-ı sadâkat ihtimâmına ihâle ve mûmâ-ileyh efendi bendeleri dahi binâsına mübâşeret eyleyip lâkin mezkûr çarşıda olan haffâflar çarşımızdan ekser araba ve yüklü hayvânât mürûr etmekle kemerlerine vehn târî olduğu ecilden işbu zelzeleden münhedim ve dükkânlarımızın dahi harâba bâdî olmağla bu def‘a yine kemer binâ olunur ise altında emniyetimiz bi’l-külliye meslûb olur deyü arzuhâl ve ne‘ûzü billâhi te‘âlâ harîk vukū‘unda şerâre sirâyetinden sıyânet için kadîmîsi üzere iki taraf dükkânları kârgîr ve kemerleri üstüne kifâyet mikdârı duvar binâ ve duvarlar arasına mukaddem olduğu vech üzere iktizâsına göre ziyâ ahzı için havâle camları vaz‘ ve asıl sokak üstü ahşabdan pûşîde ve derûnu koltuklu tavan ve üstü horasan ve kireç ile kalemkârî olmasını istid‘â etmeleriyle sâdır olan fermân-ı âlîlerine imtisâlen taraf-ı dâ‘îlerinden mürsel keşif nâibimiz es-Seyyid Halil Efendi dâ‘îleri irsâl ol dahi mahâll-i mezkûra varıp binâ emîni mûmâ-ileyh Efendi bendeleri ve mi‘mâr ağa kulları ma‘rifetleriyle mahâll-i mezkûr mu‘âyene olundukda mezkûr çarşıda sâkin ashâb-ı arzuhâl Haffâflar Kethüdâsı Ebubekir Ağa ve Yiğitbaşıları Boşnak Ahmed Çelebi ve Ustalarından Mehmed Çelebi ve Molla Numan ve Çukadâr Mehmed ve Kayıkçıoğlu Mehmed Çelebi ve mütevellî Ali Çelebi ve diğer Mehmed Çelebi ve el-Hâc Süleyman ve Mehmed Arif ve vekîl-i harç Mehmed ve Kabasakal Mehmed Çelebi ve Kerestecioğlu Mustafa ve el-Hâc Mehmed ve el-Hâc Ali ve Kireçci Ahmed Çelebi ve es-Seyyid İbrahim ve Konyalı es-Seyyid el-Hâc Ali ve el-Hâc Abdurrahman ve Canbazoğlu es-Seyyid Mustafa ve Canbaz İbrahim ve Engürülü el-Hâc Ali ve Mehmed Emin ve karındaşı Ahmed Çelebi ve es-Seyyid İsmail ve Eyübî el-Hâc İsmail ve es-Seyyid Halil ve Gürcü Osman Çelebi ve el-Hâc Mehmed ve İsmail Çelebi ve Meşinciler Yiğitbaşısı Mehmed Çelebi ve meşincilerden Molla Mustafa ve diğer Molla Mustafa ve Ahmed Usta ve Hüseyin Çelebi ve el-Hâc Mehmed ve Köseleci Mehmed ve Köseleci Ali ve Taşçı Mustafa ve Molla Mustafa ve el-Hâc Halil ve İsmail Beşe ve Dikici esnâfından Abdülkadir Çelebi ve Ahmed Usta ve Deli Ali ve Küçük Hasan ve Ali Usta ve Molla Ömer ve Abdülkadir ve Kürt Mehmed ve Ömer Beşe ve es-Seyyid Zeynelabidin ve İbrahim Usta ve Berber Hüseyin Çelebi nâm elli dört nefer kimesneler mahâll-i merkūm ber-vech-i meşrûh binâ olunursa müddet-i kalîlede husûl-pezîr olup ve ne‘ûzü billâhi te‘âlâ harîk vukū‘unda adem-i sirâyet ve isâbet medâr-ı küllîdir deyü ihbâr ve icmâ‘ ve ittifâk eyledikleri ma‘lûm-ı devletleri buyruldukda emr ü fermân hazret-i men-lehü’l-emrindir. Fî 26 Z sene [11]79.