İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 165 Hüküm no: 128 Orijinal metin no: [61-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Ali’nin Hıristo aleyhindeki kumaş bedeli davasından men olunması Sevâî semeninden 225 guruş mu‘ârazadan men‘ Ma‘rûz, Aşçı tâifesi mütekā‘idlerinden hâmil-i arzuhâl Hıristo zimmînin hasmı el-Hâc Ahmed b. Ali Çarşamba günü dîvân-ı âlîde ma‘kūd meclis-i şer‘-i şerîfde zimmî-yi merkūm Hıristo muvâcehesinde merkūm Hıristo konaklarda bey‘ ederim diyerek her topu kırk beşer guruşa olmak üzere beş top elvan sevâî kumaşımı iki yüz yirmi beş guruşa nes’eten iştirâ edip hattâ yetmiş bir senesi Şa‘bân-ı şerîfinin [62] gurresinde Aynacılar içinde Sıra Odalar nâm mahâlde cihet-i mezkûreden bana iki yüz yirmi beş guruş deyni olduğunu ikrâr ve işhâd dahi etmiş idi deyü da‘vâ ve merkūm Hıristo bi’l-külliye inkâr etmeğin müdde‘î-i mezbûr müdde‘âsına Topkapısı’nda Çivizâde mahâllesinde Lüleci Mustafa b. Mehmed nâm kimesneyi ikāme, ol dahi edâ-yı şehâd[et] edip ismi ba‘de’t-tahrîr sâir ikāme eylediği üç nefer kimesneler edâ-yı şehâdet edememeleriyle cerh olunmağla müdde‘î-i mezbûr Zilka‘detü’ş-şerîfe’nin yirminci gününden beri bi’l-imhâl bir şâhid-i âdil dahi ikāme edemeyip tahlîfe dahi tâlib olmamağla merkūm el-Hâc Ahmed bi-gayrı vech-i şer‘î husûs-ı mezkûre için mu‘ârazadan men‘ olunduğu tescîl olunup bi’l-iltimâs huzûr-ı âlîlerine i‘lâm olundu. Fî 27 Z sene [11]79.