İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 166 Hüküm no: 129 Orijinal metin no: [62-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Mustafa’nın varislerinin amcaları Hüseyin aleyhindeki değirmen gediği davasında anlaşma sağlanması Kalkandelen kazâsına tâbi‘ Triniçse nâm karye ahâlîsinden mîrâs, Ma‘rûz, Kalkandelen kazâsına tâbi‘ Triniçse nâm karye ahâlîsinden iken on üç sene mukaddem vefât eden Mehmed b. Mustafa b. Abdullah nâm kimesnenin verâseti karye-i mezbûrede sâkine zevce-i menkûhası Fâtıma bt. Mustafa ile sulbî kebîr oğulları Veli ve Halil’e ve sagīr oğlu İbrahim ve kebîre kızları Hafize ve Rahime’ye ve sagīre kızı Zeyneb’e ale’l-inhisâr kendi tarafından asıl ve sagīrân-ı mezbûrânın vasîleri olan zevce-i mezbûre Fâtıma ile karındaşları mezbûrûn Halil ve Hafize ve Rahime taraflarından husûs-ı âti’z-zikrde vekîlleri olduğu Ahmed b. Mustafa ve Receb b. Süleyman nâm kimesneler şehâdetleriyle sâbit olan mezbûr Veli Çarşamba günü dîvân-ı âlîde ma‘kūd meclis-i şer‘-i şerîfde ammileri olup zikri âtî değirmenler âlâtına vâzı‘ü’l-yed olan sâhib-i arzuhâl Hüseyin mahzarında mahmiye-i İstanbul’da Saraçhâne kurbünde gedik ta‘bîr olunur âlât-ı lâzıme mûrisimiz babam mezbûrun mülkü olmağla ammimiz işbu mezbûr Hüseyin babamız mezbûrun tarafından bi’l-vekâle sekiz yüz guruşa âhara bey‘ ve Ayvansaray’da vâki‘ Mustafa Ağa kurbünde olup hâlâ vâzı‘ü’l-yed olduğu yirmi dört sehim i‘tibârıyla üç sehim âlât-ı lâzımesini iştirâ edip babamız mezbûrun tarafından bi’l-vekâle tasarruf ve amel ederken babam mezbûr Mehmed vefât edip yetmiş iki sehim i‘tibârıyla bize mevrûs olmuş idi deyü asâleten ve vekâleten ammimiz mezbûr Hüseyin’den taleb ve da‘vâ eylediğimde ol dahi inkâr etmekle bizim beyyinemiz olmayıp ve mezbûrun yemîn edeceği dahi ma‘lûmumuz olup sulh bizim ve sagīrân-ı mezbûrânın haklarında enfa‘ olmağla bâ-vesâtet-i Müslimîn ammimiz mezbûr Hüseyin ile Eyüb’de Nişâncı kurbünde Mustafa Ağa fırınında kezâlik yirmi dört sehim i‘tibârıyla gedik ta‘bîr olunur âlât-ı ma‘lûmeden üç sehim hisse-i şâyi‘asından iki hisse üzerine sulh olup zikr olunan iki hisseyi bana teslîm etdikde ben dahi bi-kadri’l-hısasi’l-merkūme asâleten ve vekâleten ahz u kabz edip babamız müteveffâ-yı mezbûru gediklerine ve sâir cemî‘ terekesine müte‘allıka âmme-i da‘vâdan ammimiz mezbûr Hüseyin’in zimmetini bi’l-asâle ve bi’l-vekâle ibrâ-i âm ile ibrâ ve iskāt eyledim dediğini mezbûr Hüseyin tasdîk eyledikden sonra mezbûr Veli zikr olunan bargirleri sermâyesiyle sulh olmuş idim deyü nizâ‘ etmekle ammisi mezbûr dahi rızâsıyla sermâye olmak üzere malından on dört bin akçe dahi verip ve da‘vâsından mezbûrun zimmetini ibrâ etdikde ol dahi vech-i meşrûh üzere bi-kadri’l-hısas asâleten ve vekâleten meblağ-ı merkūm on dört bin akçeyi ahz u kabz ve bu vechile kat‘-ı nizâ‘ eyledikleri tescîl olunup bi’l-iltimâs huzûr-ı âlîlerine i‘lâm olundu. Fî 26 min-Zilhicceti’ş-şerîfe sene 1179.