İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 167 Hüküm no: 130 Orijinal metin no: [63-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Ohan’ın un bedelinden dolayı Mihal aleyhindeki alacak davasında anlaşma sağlanması Tekfursarayı’nda vâki‘ francalacı fırın gediği Ma‘rûz, Tekfursarayı’nda uncu arzuhâlde merkūmü’l-ism Ohan Çarşamba günü dîvân-ı âlîde ma‘kūd meclis-i şer‘-i hatîrde mahâlle-i mezkûrda Francılacı olan hâmil-i arzuhâl Mihal zimmî ile terâfu‘larında merkūm Mihal’in francala işlediği fırınının gedik ta‘bîr olunur âlâtı dört hisse i‘tibârıyla iki hissesi gāibân ani’l-meclis Nikola ve Melkon nâm zimmîlerin ve bir hissesi merkūm Mihal’in ve bir sehmi dahi mesfûr Ohan’ın üzerinde olduğu tarafeynin ikrâr ve tasdîkleriyle müte‘ayyen oldukdan sonra merkūm Ohan dakīk semeninden bâkī mesfûr Mihal’den iddi‘â eylediği dört yüz yetmiş iki guruşu iki yüz yetmiş guruşa sulh olup ziyâde iki yüz iki guruşa müte‘allıka da‘vâdan merkūm Mihal’in zimmetini ibrâ ve iskāt eyledikde ol dahi yirmi iki aydan beri bana bey‘ eylediği dakīki narh-ı rûzîsinden birer akçe ziyâdeye vermiş idi deyü eylediği da‘vâsından merkūm Ohan’ın zimmetini kezâlik ibrâ ve iskāt ve her biri ibrâyı ba‘de’l-kabûl bedel-i sulh-ı mezkûr iki yüz yetmiş guruşu on güne dek edâya merkūm Mihal istimhâl etdikde merkūm Ohan dahi râzı olup bu minvâl üzere kat‘-ı nizâ‘ eyledikleri tescîl olunup İbrahim Çavuş kulları iltimâsıyla huzûr-ı âlîlerine i‘lâm olundu. Fî 26 Zilhicceti’ş-şerîfe sene [11]79.