İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 167 Hüküm no: 131 Orijinal metin no: [63-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asvador v. Avadik’e kefaletten dolayı borçlu olan Memiş b. Ali’ye borcunu ödemesi hususunda tenbihte bulunulması Cihet-i kefâletden 750 guruş hüküm Ma‘rûz, Sorguççular Hanı’nda arzuhâl eden Asvador v. Avadik Çarşamba günü Dîvân-ı âlîde ma‘kūd meclis-i şer‘-i hatîrde Bahçekapısı’nda kömürcü olup derûn-ı arzuhâlde ismi mezkûr Memiş b. Ali nâm kimesne mahzarında Südlüce’de sâkin gāib ani’l-meclis Câbî el-Hâc Hüseyin nâm kimesne zimmetinde cihet-i karzdan olan yedi yüz elli guruş hakkıma mezbûr Memiş yetmiş yedi senesi Saferi’nin gurresinde han-ı mezkûrda kefil ve zâmin olmağla kefâletine binâen meblağ-ı mezkûr yedi yüz elli guruşu taleb ederim deyü da‘vâ ve mezbûr Memiş cevâbında mezbûr el-Hâc Hüseyin’in ancak nefsine kefil olduğunu ikrâr ve mâla kefâletini inkâr etmeğin müdde‘î-i mesfûr mezbûr Memiş’in mâla kefâletini mahâllerinden lede’t-tezkiye udûlden oldukları ihbâr olunan han-ı mezkûr kurbünde Mûytâb İsmail b. Mustafa ve Halil b. Hüseyin nâm kimesneler şehâdetleriyle isbât etmeğin mûcebiyle meblağ-ı mezbûr yedi yüz elli guruşun bi-hükmi’l-kefâle edâsına mezbûr Memiş’e tenbîh-i şer‘î olunduğu huzûr-ı âlîlerine i‘lâm olundu. Fî 27 Zilhicceti’ş-şerîfe sene 1179.