İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 175 Hüküm no: 142 Orijinal metin no: [68-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da mevcut kahve miktarının tesbiti ve İstanbul’a kahve getirenlerin isim listesi Sah Mısır tüccârından kahve bazergânları İstanbul kādısı fazîletlü efendi Gümrük Emîni ağa’nın işbu takrîrine nazar ve nizâm-ı beldeye evfak ve ibâdullaha enfa‘ olacak vechile sûret-i nizâmını mülâhaza ve hâlâ hanlarda ve sefînelerde ne mikdâr kahve mevcûd ise gümrükde defter-i mahsûsa kayd ve beher şehr ne mikdâr tevzî‘ olunur ise mevcûddan fürû-nihâde ve bir tarafdan gelenlerine mevcûd zam ve mahâll-i mu‘ayyenede hıfz ve dâimâ vârid ve masrûf mazbût olmak vechile taht-ı zâbıta rabt ve sûret-i nizâmı i‘lâm eyleyesin deyü [buyruldu]. Fî 6 Zilhicce sene 1179. Mısır tüccârlarından Âsitâne-i sa‘âdet’e kahve getiren zikri âtî bazergânların takrîrleridir. Manavzâde el-Hâc Ahmed Kabataşlızâde Seyyid el-Hâc Süleyman Mısrî Şerîf Ali Kabataşlı dâmâdı Seyyid el-Hâc Süleyman Dodoslu Molla Hüseyin Florsa Hacı Mustafa Kurşuncu el-Hâc Ali Karamânî Seyyid el-Hâc İsmail Alâiyeli Seyyid el-Hâc Ramazan Güzelhisarî el-Hâc Mustafa Tireli Seyyid el-Hâc Abdullah Mağribli Ebubekir Tokâtî el-Hâc Abdullah Kalemtraşçı el-Hâc Salih Diyarbekirî el-Hâc Mustafa Malatyalı el-Hâc İbrahim Haffâf dâmâdı el-Hâc İbrahim Yenişehirli el-Hâc Mehmed Fettahzâde el-Hâc Ahmed Yenişehirli Ahmed Ağa Mısırlı Kara Mehmed Kantarcı el-Hâc Ahmed Yumurtacı el-Hâc Ali Kösezâde el-Hâc İbrahim Çolağın el-Hâc Hasan Köse Süleyman oğlu el-Hâc Osman Mahmudpaşalı el-Hâc Ahmed İstansöylü Kara Hüseyin Çolakzâde el-Hâc Mustafa Sarı Hacı Hasan’ın el-Hâc Abdurrahman Gümrük Emîni Ağa’nın takrîri Bâlâda mezkûr otuz nefer Mısır bazergânları gümrüğe gelip bu def‘a hamden lillâhi te‘âlâ mashûben bi’s-selâme Âsitâne-i aliyye’ye gelen kahvelerimiz öteden beri kahve vaz‘ olunugelen hanlardan Çukur Han ve Papasoğlu Hanı ve Sepet Hanı ve Ağa Hanı ve Cizyedâr Hanı demekle meşhûr beş aded hanlara ber-mûceb-i defter vaz‘ ve muhtekir tâifesi yedlerine girmemek ve az evkātda itlâf ve izâ‘at olunmayıp mazbût ve hıfz ve hırâset olunmak için gümrükden kahve nakline memûr gümrük hamalları zikr olunan hanlardan mâ‘adâ âhar mahâllere kahve getirmeyip ol vechile mazbût ve mahfûz olduğu hâlde attârân esnâfı yedlerinde olan kahveleri kalmadığı sûretde kethüdâları ma‘rifetiyle dükkânları ve attârânın isim ve resimleri ve beher attârın hâllerine göre ne mikdâr kahve verilmek iktizâ eder ise iktizâsına göre bir ay âharına değin tevzî‘ olunmak ve bazergânân tâifesinden dahi beher bazergânın ne mikdâr kahve ferdeleri var ise onların yedlerinde olan kahve ferdeleri bilâ-şefâ‘atin ve bilâ-murâ‘ât-ı hâtır herkesin isimleri ve resimleri ve aded ve mikdârları ile defter olunup herkesin ferdelerinin mikdârına göre ber-vech-i i‘tidâl tevzî‘a verilip kimesnenin kahvesi hîn-i tevzî‘de tecâvüz ve noksân olunmamak şartıyla bi-avnihî te‘âlâ ecânibden kimesneye kahve verilmez ise ibâdullahın kahveye muzâyakası çekilmeyeceğine cümlemiz kefâlet mertebelerinde ta‘ahhüd ederiz deyü takrîr eyledikleri ve bundan mâ‘adâ ba‘zı berrânî kimesnelerden ve Mısırlı tâifesinden yedlerinde bulunan cüz’î ve küllî sermâye ile üçer ve beşer ferde ve torba ve zenbil ile kahve getirip onu da fürûht ve akçesini ahz ve savb-ı maksûdlarına avdet etmek isteyenlere cevâbınız nedir deyü kendülerden suâl olundukda, bu misillüler berrânî garîb yiğit zuhûr eylediği hâlde gereği gibi taharrî ve tecsîs [tecessüs]? olunup hakīkatde olmadığının kendü malı olduğu sûretde ve dört beş ferde ve torba ve zenbil midir ibtidâ olan tevzî‘de verilip ondan dahi elem çekmeyiz deyü ve bundan sonra gelecek kahvelerinin fiâtı bu kahvelerin fiâtından dûn olur ise mektûblarınıza nazar ve fiâtınız dahi tenzîl olunur deyü kendülere i‘lân ve işâ‘at olundukda onu dahi vukū‘u üzere haberini ifâde ederiz ve herbirleri hilâfı irtikâb etmeyiz deyü cevâb, lâkin bu husûslara müsâ‘ade-i aliyyeleri erzânî buyrulduğu hâlde fermân-ı âlîleri sudûruna muhtâc olduğu ma‘lûm-ı devletleri buyruldukda ol bâbda emr ü fermân devletlü inâyetlü efendim sultânım hazretlerinindir. Fî 6 Zilhicce sene 1179.