İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 176 Hüküm no: 143 Orijinal metin no: [68-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mısır Çarşısı’nda bulunan attar esnafının kahve hususuna dair arzuhalleri Sah, İstanbul kādısı fazîletlü efendi ve gümrük emîni ağa nizâm-ı beldeye evfak ve ibâdullaha enfa‘ olduğu vechile husûs-ı mezbûru taht-ı zâbıtaya rabt ve i‘lâm eyleyesin deyü [buyruldu]. Fî 27 Zilhicce sene 1179. Arzuhâl-i attârân Devletlü, merhametlü, inâyetlü sultânım hazretleri sağ olsun. Âsitâne-i sa‘âdet-i devlet-âşiyânda sûk-ı Mısrîde kahve attârânı kullarının arzuhâlleridir ki Mısır tüccârı kullarının kesbleri olup mahrûse-i mezkûreye selâmetle gelip der-mahzen ve mevcûdâtları ihsân-ı hak kesret olup muzâyaka-i hâl olmayıp ehl-i sûk-ı [69] attârân ibâd-ı Müslimîn-i nâssa kifâyet mikdârı dükkânlarımızda bulunsun deyü döğdürüp satıldıkça birer ikişer ferde herkes alâ-kadri’t-tâka bazergândan almak iltimâsıyla ve aldıkda der-mahzen olunmuş kahvemizi def‘aten alur olur ise ve dilediğimiz bahasıyla veririz, böyle iki üç ferde müfeterrik olmaz deyü def‘le cevâb ve kethüdâmıza istinâdlarıyla yekdil olduğu bu hâletler ile sûkumuzda ihfâ olunmakda ve ancak bazergânından vech-i muharrer üzere taleb olundukda vermediklerinde her birlerimizin bâ‘is-i mağdûriyetimiz olan mevâddan olmak hasebiyle -Hak te‘âlâ Devlet-i aliyyeyi ber-karâr eyleye- bu misillü hareket ile mahzenleri dolu işbu senede ziyâdesiyle belegan mâ-belağ her taraf dolu iken iki yüz guruşa meylleriyle husûslarının rızâ-i devlete mugāyir idüğünü fazîletlü İstanbul kādısı efendi huzûrlarında murâfa‘aya e‘azzallâhü’ş-şer‘ ve dediğimizden onlar bizi gümrük emînine çekip belde-i Kostantıniye’de Devlet-i aliyye’nin irâde-i aliyyesi buyruldukda İstanbul efendisi nizâmına i‘tibârda iken adem-i itâ‘atları bu hâl keyfiyetlerimiz perîşân ve her ahvâl kulları müsâ‘ade-i devletlerine menût ve mahsûsdur. Bâkī emr ü fermân sultânımındır. Bende Attârân-ı kahve-i sûk-ı Mısır Der-Âsitâne