İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 179 Hüküm no: 145 Orijinal metin no: [70-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da kereste ve saire nakleden sırık hamallarının ücretlerinin, arka ve at hamallarına kıyas edilerek belirlenmesi Arka ve at hamalları nizâmı Bâ-sah. İstanbul kādısı fazîletlü efendi ( ) ve izzetlü Yeniçeri Ağası Âsitâne-i aliyye’de vâki‘ arka ve at hamallarının nizâmları bundan akdem bâ-fermân-ı âlî rü’yet olunup her iskele ve mahâllerin semtleri tasrîhiyle sâbıkına kıyâsen fîleri vaz‘ ve defter ve bâlâsına fermân-ı âlî ısdâr ve zâbıta-i kaviyeye rabt olunup ancak yine Âsitâne-i sa‘âdet’de kereste ve ahmâl-i sâire nakil eden sırık hamallarının fiâtı müddet-i medîdeden beri rü’yet olunmadığından bu def‘a ecr-i misillerinin is‘âf-ı muzâ‘afı ücrete râzı olmadıkları ve ibâdullaha gadr ve ızrâr ve ümenâ-yı ebniye ve evkāf-ı şerîfeye zahmet verdikleri âşikâr olduğu hasebiyle bunların dahi zâbıta-i müstahseneye ifrâğları mühim ve muktezî olmağla imdi gümrük önü ve keresteciler ve sâir mahâllerde mevcûd sırık hamallarının kethüdâ ve ihtiyârlarını ihzâr ve kadîmden mukāyese olduğu vech üzere nakil edecekleri kereste ve sâire kaç nefer arka hamalına mütehammil ise ol mikdâr ücret takdîr eyledikden sonra her iskele ve her bir mahâl ve semt için arka hamallarına vaz‘ olunan fiâta kıyâs ve tatbîk ile ecr-i misillerini takdîr ve bu vechile nizâm ve tescîl ve müceddeden tahrîr ve defter olunup bundan ziyâde mutâlebe ile ibâdullaha ızrâr kasdıyla huşûnet ederi olur ise haklarından gelineceği dahi alâ-vechi’t-tehdîd tenbîh ve vakit vakit ahvâllerini tefahhus ve ziyâde ücret talebi ve ahz eder olur ise hakkından gelinmek için isim ve resimleriyle i‘lâm eyleyesin deyü [buyruldu]. Fî 5 M sene 1180.