İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 179 Hüküm no: 146 Orijinal metin no: [70-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Öküz arabacılarının ücretlerinin her bir iskele, mahalle ve semt için at hamallarına kıyas edilerek tespit edilmesi Arka ve at hamalları nizâmı Bâ-sah. İstanbul kādısı fazîletlü efendi Âsitâne-i aliyye’de vâki‘ arka ve at hamallarının nizâmları bundan akdem bâ-fermân-ı âlî rü’yet olunup her iskele ve mahâllerin semtleri tasrîhiyle sâbıkına kıyâsen fîleri vaz‘ ve defter ve bâlâsına fermân-ı âlî ısdâr ve zâbıta-i kaviyeye rabt olunup ancak yine Âsitâne-i sa‘âdet’de kereste ve ahmâl-i sâire nakil eden öküz arabacılarının fiâtı müddet-i medîdeden beri rü’yet olunmadığından bu def‘a ecr-i misillerinin is‘âf-ı muzâ‘afı ücrete râzılar olmadıkları ve ibâdullaha gadr ve ızrâr ve ümenâ-yı ebniye ve evkāf-ı şerîfeye zahmet verdikleri âşikâr olduğu hasebiyle bunların dahi zâbıta-i müstahseneye ifrâğları mühim ve muktezî olmağla imdi Karagümrükde mevcûd öküz arabacılarını ihzâr ve kadîmden mukāyese olduğu vech üzere arabalarının mikdâr-ı hamllerini kendilerden suâl ile tahkīk eyledikden sonra her iskele ve bir mahâl ve semt için at hamallarına vaz‘ olunan fiâta kıyâs ve tatbîk ile ecr-i misil takdîr ve bu vechile nizâm ve tescîl ve müceddeden tahrîr ve defter edip bundan ziyâde mutâlebe ile ibâdullaha ızrâr kasdıyla huşûnet ederi olur ise haklarından gelineceğini dahi alâ-vechi’t-tehdîd tenbîh ve vakit vakit ahvâllerini tefahhus ve ziyâde ücret talebi ve ahz eder olur ise hakkından gelinmek için isim ve resimle i‘lâm eyleyesin deyü. Fî 5 M sene [1]180.