İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 180 Hüküm no: 147 Orijinal metin no: [71-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Abdullah’ın Mehmed Sadık Efendi’ye olan borcunu ödeyerek menzilini rehinden kurtarması Menzil Ma‘rûz, Mahmiye-i İslambol’da Sarıgez kurbünde Çıkrıkçı Kemâl mahâllesinde sâkine ve zâtı mu‘arrefe Havva bt. Abdullah nâm hatun Çarşamba günü dîvân-ı âlîde ma‘kūd meclis-i şer‘-i şerîfde mahâlle-i mezbûrede vâki‘ nezâret-i dâ‘îleride olan evkāfdan Beyzâde Mustafa Efendi Vakfı’ndan etrâf-ı erba‘ası mezbûre Havva’nın âhar menzili ve Evliyâ Hasan Ağa menzili ve Mustafa Efendi menzili ve tarîk-i hâs ile mahdûd menzile vâzı‘ü’l-yed olan Mehmed Sadık Efendi b. Abdullah mahzarında menzil-i mahdûd-ı mezkûrun taraf-ı vakf-ı mezkûrdan nısfı benim ve nısf-ı şâyi‘-i âharı zevcim hâzır bi’l-meclis İsmail b. Mehmed nâm kimesnenin tasarrufunda iken mezbûr Mehmed Sadık Efendi’den istidâne ve kabz eylediğim üç yüz guruş deynim mukābelesinde zevcim mezbûrun izniyle mecmû‘unu ferâğ bi’l-vefâ tarîkiyle mezbûr Mehmed Sadık Efendi’ye bâ-ma‘rifet-i mütevellî ferâğ ve teslîm etmiş idim. Hâlâ edâ-yı deyn murâd edip mezbûr Mehmed Sadık Efendi menzil-i mezkûrda bir seneden beri sâkin olmağla her şehir îcâb eden dörder guruş ecr-i mislini taleb ederim deyü bu sûretde eylediği ecr-i misil da‘vâsı mesmû‘a olmayıp mu‘ârazadan men‘ olundukdan sonra mezbûre Havva deyni olan üç yüz guruşu meclis-i şer‘-i şerîfde mezbûr Mehmed Sadık Efendi’ye teslîm ve edâ etmekle, ol dahi bâ-re’y-i mütevellî menzil-i mezkûrun nısfı mezbûre Havva’ya ve nısf-ı şâyi‘ini dahi zevci mezbûr üzerine ferâgat, onlar dahi kabûl edip mezbûre Havva mezbûr Mehmed Sadık Efendi kıbelinde vechen mine’l-vücûh aslâ hakkım kalmadı deyü ikrâr ve i‘tirâf ve kat‘-ı nizâ‘ eyledikleri tescîl olunup bi’l-iltimâs huzûr-ı âlîlerine i‘lâm olundu. Fî ( )