İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 181 Hüküm no: 148 Orijinal metin no: [71-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Efendi’nin duvarını yıkıp yeniden inşa etmesine engel olmayacağına dair Mustafa b. Ali’nin taahhütte bulunması Keşif Ma‘rûz, Sâdır olan fermân-ı âlîlerine imtisâlen kıbel-i şer‘-i şerîf-i enverden irsâl olunan keşif nâibimiz müderrisîn-i kirâmdan es-Seyyid Halil Efendi dâ‘îleri hâssa mi‘mârlarından Osman Halîfe ve sâir ümenâ-yı şer‘le mahmiye-i İstanbul’da Sultân Mehmed Han Câmi‘-i şerîfi kurbünde Hoca Hayreddin mahâllesinde vâki‘ Kebîrîzâde Evkāfı’ndan olan menâzile hâs tarîk üzerine varıp akdeylediği meclis-i şer‘-i hatîrde ashâb-ı arzuhâlden tarîk-i hâss-ı mezkûr ittisâlinde bir bâb mülk menzili olan Rumeli kuzâtından el-Hâc Halil Efendi b. Ömer arzuhâlde mezkûrü’l-ism nakkāş Mustafa b. Ali mahzarında takrîr-i kelâm edip mezbûr Mustafa’nın işbu tarîk-i hâss-ı mezkûr üzerine binâ ve ihdâs eylediği odanın sütunları benim inhidâma mâil, mu‘âyene olunan duvarıma muttasıl olmağla duvar-ı mezkûru hedm ve tecdîdden bi-gayrı vechin beni men‘ eder deyü ba‘de’d-da‘vâ, mezbûr Mustafa inkârından mâ‘adâ mezkûr Halil Efendi duvar-ı merkūmu hedm ve binâ edince bî-vech mümâna‘at etmemek üzere ta‘ahhüd eylediğini mezbûr dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 3 min-Muharrem sene [1]180.