İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 183 Hüküm no: 150 Orijinal metin no: [73-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zileli Mehmed’in vefat eden İshak Nazif isimli küçük çocuğun mirasından faydalanabilmesi için öncelikle varis olduğunu ispat etmesi gerektiği Hukūk, 1100 guruş Ma‘rûz, Arzuhâl eden Zileli Mehmed b. Bekir b. Osman mahmiye-i İslambol’da meclis-i şer‘-i hatîrde Karagümrük kurbünde Keçecipîrî mahâllesinde sâkin iken bundan akdem vefât eden İshak Nazif b. el-Hâc Mehmed Efendi b. Mehmed b. el-Hâc Ömer nâm sagīrin vasiyy-i muhtârı Çukadâr Ahmed b. Mustafa mahzarında sagīr-i mezbûrun hâleteleri Meryem ve Hadîce nâm hatunlar sagīr-i mezbûrun zî-rahm cihetinden vâriseleri olduklarını bundan akdem vasiyy-i mezbûr muvâcehesinde ba‘de’l-isbât ve’l-hükm vasiyy-i mezbûr yedinde olan bin sekiz yüz doksan iki buçuk guruş hisselerini ma‘rifet-i şer‘le ahz u kabz etmeleriyle benim büyük babam mezbûr Osman sagīr-i mezbûrun ceddi mezbûr el-Hâc Ömer ile li-ebeveyn karındaşlar ve babaları ismi diğer el-Hâc Mehmed ve dedeleri ismi el-Hâc Ali ve anaları ismi Şehban bt. Bekir ve maskat-ı re’sleri Zile’de Sakalar mahâllesi olup ben sagīr-i mezbûr usûbet-i nesebiye cihetinden vâris ve mezbûretân Meryem ve Hadîce’den mukaddem olmağla sicill-i mahfûzda mukayyed yetmiş sekiz senesi Muharremi’nin yirmi altıncı günü târîhiyle müverrah i‘lâm mantûkunca mezbûrâtın vasiyy-i mezbûrdan makbûzlarını i‘tirâf eylediğim bin sekiz yüz doksan iki buçuk guruşu mezbûretândan âhar ammimiz oğlu İbrahim ile ma‘an da‘vâya tasaddî edip onlar dahi verâseti inkâr etmeleriyle mezbûretân ile an-inkâr beş yüz guruş bedel-i makbûz mukābelesinde sulh olup sagīr-i mezbûrun cemî‘ terekesine müte‘allıka âmme-i de‘âvîden mezbûretânın zimmetlerini ibrâ etmiş idik. Lâkin meblağ-ı mezkûrun bin yüz guruşu vasiyy-i mezbûr yedinde kaldığı hâlâ benim ma‘lûmum olmağla taleb ederim deyü eylediği da‘vâsında evvelâ verâset-i meşrûhasını isbât etmediğinden mâ‘adâ takrîri üzere vasiyy-i mezbûrdan şer‘an da‘vâsı mesmû‘a olmadığı bi’l-iltimâs huzûr-ı âlîlerine i‘lâm olundu. Fî 8 Muharremü’l-haram sene [11]80.