İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 184 Hüküm no: 151 Orijinal metin no: [73-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çıkrıkçı Kemal mahallesi sakinlerinden Şadi Abdülkerim Ağa’nın mahalleden çıkarılması Şadi’yi mahâlleden ihrâç Ma‘rûz, Mahmiye-i İslambol’da Çıkrıkçı Kemâl mahâllesi ahâlîlerinden Hâfız Mehmed Ağa ve Çavuş Osman ve Devâtî İbrahim ve Ahmed nâm kimesneler meclis-i şer‘-i hatîrde mahâlle-i mezbûrede sâkin Şadi Abdülkerim Ağa b. el-Hâc İbrahim mahzarında mezbûr Abdülkerim Ağa’nın duvarı zelzeleden tarîke meyl ve hânelerimize zarârı olmağla hedmi için şer‘-i şerîfe da‘vet etdiğimizde anamıza ve avradımıza cimâ‘ lafzıyla şetm ve ırzımızı hetk eylediğinden mâ‘adâ menzilimizi oğluna ve hizmetkârı zimmîye taşladıp ızrâr murâd eder deyü da‘vâ ve ahâlî-i mahâlleden müderrisîn-i kirâmdan es-Seyyid Ahmed Efendi ve Mehmed Esad Efendi ve kuzâtdan Ahmed Efendi ve Bekir Efendi ve İmam Bekir Efendi ve Şeyh İsmail Efendi ve küttâbdan Mustafa Efendi ve zü‘amâdan İbrahim Ağa ve Hâfız Mustafa Efendi, Berber Ahmed Çelebi ve Miftâhî Ahmed Ağa ve Duhânî Ali ve küttâbdan Mehmed Efendi ve Devâtî İbrahim [ve] Devâtî Yusuf, Çukadâr Yusuf meclis-i şer‘-i şerîfe hâzirûn olup mezbûr Şadi Abdülkerim Ağa için kendi hâlinde olmayıp dil-âzâr ve bed-gû olmağla [74] vücûhla kendiden mutazarrır olmamız ile mahâllemizden ihrâc ile şer ve mazarrâtı def‘ olunmak bâbında fermân-ı âlîşân sudûrunu istid‘â eyledikleri mübâşiri Halebli el-Hâc Süleyman Çavuş kulları iltimâsıyla huzûr-ı âlîlerine i‘lâm olundu. Fî 9 min-Muharrem sene 1180.