İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 192 Hüküm no: 162 Orijinal metin no: [78-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Uzunoğlu Zaki’nin borçlarının gurema suretiyle terekesinden ödenmesi Mîrâs-ı zimmî 3110 [guruş] Ma‘rûz, Mahmiye-i İstanbul’da Vezîr Hanı tüccârından olup yetmiş bir senesi târîhinde Varna kazâsında hâlik olan Uzunoğlu Zaki v. Panayot zimmînin askerî kassâmı efendi ma‘rifetiyle terekesi tahrîr ve defter ve düyûn-ı müsbitesini edâya Avak v. İsael vasî nasb olundukdan sonra Dergâh-ı âlî kapıcıbaşılarından Tokâtî Ahmed Ağa b. Abdullah’ın zimmî-yi mesfûr zimmetinde üç bin yüz on guruş alacağı olup kable’l-ahz vefât etmekle verese-i münhasırasından olup kendi tarafından asıl ve zevceleri Âişe ve Emetullah ile evlâd-ı kibârı es-Seyyid Abdurrahman ve es-Seyyid Mehmed ve es-Seyyid Süleyman ve Şerîfe Ümmühani taraflarından vekîl olan diğer oğlu es-Seyyid Mustafa kassâm-ı askerî huzûrunda vasiyy-i merkūm muvâcehesinde deyn-i merkūmu isbât ve vasiyy-i mersûmun makbûzu üç bin yüz on guruş kıymetli terekesini deyn-i merkūm için kabz ve beynlerinde ba‘de’t-taksîm Çobanoğlu Mardıros’un şerîki oğlu Bogos yirmi yedi bin yedi yüz altmış guruşdan bâkī on bin yedi yüz altmış altı guruş hâlik-i merkūm Zaki ile şerîki Artin zimmetinde alacak hakları olduğunu ve ba‘dehû Asvador ve şerîki Avanis nâm zimmîler dahi bin seksen üç guruş kezâlik hakları olduğu Müslim şâhidler ile dahi mersûm muvâcehesinde isbât etmekle dâyin-i akdem müteveffâ-yı mezbûr Ahmed Ağa’nın veresesi mezbûrûndan red lâzım gelmekle vasiyy-i mersûm verese-i mezbûreden vekîl-i mezbûr es-Seyyid Mustafa’ya zafer bulup yine kassâm-ı askerî huzûrunda murâfa‘a olup bâ-defter makbûzu olan hissesinden elli iki bin altı yüz elli iki akçe red lâzım geldiği ikrârıyla sâbit olup i‘lâm olunmağla mezbûr es-Seyyid Mustafa Nakîbü’l-eşrâf meclisinde mahbûs iken zikri âtî da‘vâsını arzuhâl etmekle mûcebince sâdır olan fermân-ı âlîlerine imtisâlen mezbûr es-Seyyid Mustafa Çarşamba günü arz odasında huzûr-ı âlîlerinde ma‘kūd meclis-i şer‘-i şerîfde dâyin-i merkūmûndan mesfûr Mardıros ile terâfu‘larında hâlik-i merkūm Zaki’nin Perişah nâm zimmî zimmetinde işbu merkūm Mardıros ve şerîki hâzır bi’l-meclis Bogos’un bi-tarîkı’s-sulh vasiyy-i merkūm ma‘rifetiyle kabz ve alacaklarına mahsûb eyledikleri iki yüz guruşdan mâ‘adâ on bin guruş dahi hakkı olup merkūm Perişah meblağ-ı merkūm on bin guruşu işbu merkūm Mardıros’dan havâle edip ol dahi kabûl ve hattâ merkūm Mardıros yetmiş senesi Şa‘bânı’nın gurresinde Kadırga limanı’nda vâki‘ menzilimizde ikrâr dahi edip kable’l-ahz merkūm [79] Zaki hâlik olup meblağ-ı mezkûr on bin guruşu merkūm Mardıros zimmetinde kalmağla benden reddi lâzım gelen elli iki bin altı yüz elli iki akçeyi merkūm Mardıros’dan taleb ederim deyü da‘vâ ve merkūm Mardıros inkârından mâ‘adâ müdde‘î-i mezbûrun vech-i meşrûh üzere da‘vâsı garîmin garîmden da‘vâsı sûreti olup bu sûretde merkūm Mardıros’a hasm-ı şer‘î olmadığı kütüb-i fetâvâda musarrah ve husûs-ı mezkûr hâlik-i merkūmun vasîsi iddi‘âsına mevkūf olup mezbûr es-Seyyid Mustafa merkūm Mardıros ile şer‘an mu‘ârazadan men‘ olunmak iktizâ etmekle kendinden reddi lâzım gelen elli iki bin altı yüz elli iki akçenin bâ-i‘lâm-ı şer‘î edâsıyla ilzâm olunduğu mübâşiri es-Seyyid Mehmed Çavuş iltimâsıyla huzûr-ı âlîlerine i‘lâm olundu. Fî 13 Muharrem sene [11]80.