İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 193 Hüküm no: 163 Orijinal metin no: [79-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Değirmen kirası hususunda anlaşma sağlandığı Hazret-i Eyüb’de Koltuk kurbünde değirmen Ma‘rûz, Eyüb’de Kolluk kurbünde vâki‘ mukaddemâ içinde fırını ve dört horosu olup bundan akdem fırın-ı mezkûrun mahâlline bir horos dahi binâ olunup beş horos olan değirmende müşâhereten müstecirleri olan Bağdisar ve Sahak ve Haçok nâm zimmîler mahmiye-i İslambol’da meclis-i şer‘-i hatîrde değirmen-i mezkûra iştirâken mutasarrıflar olup kendi tarafından asıl ve müşteriki Fâtıma Hatun tarafından ber-vech-i âtî tasdîka vekîl olan Ahmed Ağa nâm kimesne mahzarında değirmen-i mezkûru biz mu‘tâd üzere beher şehr otuz beşer guruşa mezbûrân Ahmed ve Fâtıma Hatun’dan isticâr ve kabûl edip lâkin işbu Muharremü’l-haram gurresine gelince iki ayda değirmen-i mezkûrun iktizâ eden mahâllerine malımızdan altmış bir guruş harc u sarf ve ta‘mîr edip ücret-i mezkûreye takās murâd eylediğimizde mezbûr Ahmed Ağa dahi râzı olmamağla beynimizde nizâ‘ vâki‘ olmuş idi. Hâlâ beynimiz ıslâh olunup biz değirmen-i mezkûru kemâ-fi’l-evvel otuz beş guruşa isticâr ve kabûl eylediğimizden sonra her mâh yirmi altışar guruşunu mezbûrûna nakden teslîm ve edâ edip bâkī dokuz guruş ile değirmen-i mezkûrun şehriye icâre-i müeccelesi olan elli beş parayı câbîsine biz edâ etdikden sonra değirmen taşları ve ahır ta‘mîri ve kiremid aktarması ve tulumba meremmâtı ve anbar kalafatı makūlesi ta‘mîrâtını biz tekmîl ve itmâm ve on guruşdan ziyâde olan ta‘mîrât-ı külliyeyi yine mezbûrân mallarından etmek üzere mezbûrân ile mukāvele ve mu‘âhede ve bu minvâl üzere kat‘-ı münâza‘a eyledik dediklerini mezbûr Ahmed Ağa tasdîk eylediği tescîl olunup rızâlarıyla huzûr-ı âlîlerine i‘lâm olundu. Fî 12 Muharrem sene 1180.