İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 194 Hüküm no: 164 Orijinal metin no: [79-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey Camii Müezzini Ahmed’in müezzinliğe meşruta menzilden kardeşinin küçük oğlu ve annesini çıkarmamak üzere taahhütte bulunması Mustafa Bey Câmi‘-i şerîfi müezzinlik Ma‘rûz, Sâhib-i arzuhâl Mehmed Emin nâm sagīrin mu‘arrefetü’z-zât anası ve vasîsi Havva [Hâ]tun meclis-i şer‘de derkenâr olunduğu üzere nezâret-i dâ‘îlerinde olan evkāfdan Yeniodalar kurbünde Mustafa Bey Câmi‘-i şerîfinde müezzinlik ciheti üzerinde olan sagīr-i mezbûrun ammisi arzuhâlde mezkûr Ahmed b. Mahmud ile terâfu‘larında cihet-i mezkûre vasîsi olduğum sagīr-i mezbûrun babası Mehmed b. Mahmud üzerinde iken vefât etdikde bir takrîb ile karındaşı işbu mezbûr Ahmed üzerine berat etdirmişdir deyü sagīr-i mezbûre tevcîh olunmasını istid‘â, lâkin mezbûr Ahmed karındaşı mezbûr Mehmed’in hâl-i hayâtında altmış iki târîhinde kendisine rızâsıyla ferâğ ve kasr-ı yed eylediği el-Hâc Mehmed b. Mehmed b. Mehmed ve Hâfız Mehmed b. Abdullah nâm kimesneler haberleriyle isbât etdikden sonra mezbûr Ahmed zikr olunan müezzinliğe meşrûta olup mârrü’z-zikr Mustafa Bey mahâllesinde vâki‘ etrâf-ı erba‘ası [80] Hüseyin Efendi ve Fesçi Hacı Usta menzilleri ve hamam külhanı ve tarîk-i âm ile mahdûd hâlâ sagīr-i mezbûr ile anası mezbûrenin sâkin oldukları menzilden mezbûrânı ihrâç etmemek üzere ta‘ahhüd etdikde mezbûre Havva dahi menzil-i mezkûrun müştemilâtı için malımdan binâ etmiş idim mülkümdür deyü tasaddî eylediği da‘vâsından fâriğā olup bu minvâl üzere kat‘-ı nizâ‘ eyledikleri rızâlarıyla tescîl olunup mübâşiri Abdullah Çavuş kulları iltimâsıyla huzûr-ı âlîlerine i‘lâm olundu. Fî 13 Muharrem sene 1180.