İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 194 Hüküm no: 165 Orijinal metin no: [80-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer’in dükkânının evlerine zararı olduğunu iddia edenlerin davadan men olunmaları Kapan-ı dakīk kurbünde keşif Ma‘rûz, Sâdır olan fermân-ı âlîlerine imtisâlen savb-ı şer‘-i âlîden irsâl olunan müderrisîn-i kirâmdan keşif nâibimiz es-Seyyid Halil Efendi dâ‘îleri hâssa mi‘mârlarından Abdullah ve Ahmed halîfeler ve sâir ümenâ-yı şer‘le mahmiye-i İstanbul’da Kapan-ı dakīk kapısı dâhilinde Sinan Bey mahâllesinde vâki‘ sâhib-i arzuhâl el-Hâc Ömer nâm kimesne tasarrufunda olan şa‘riyyeci? kârhânesine varıp akdeylediği meclis-i şer‘-i hatîrde kârhâne-i mezkûr civârında menâzil mutasarrıflarından es-Seyyid Mehmed ve Mustafa ve Hüseyin nâm kimesneler mezbûr el-Hâc Ömer muvâcehesinde işbu derûnunda akd-i meclis-i şer‘-i kavîm olunan menzili merkūm el-Hâc Ömer beş seneden beri icâr ve içinde şa‘riyyeci kârhânesi ihdâs etdirdip lâkin hâne-i mezkûrun mengenesi darbından menzillerimize vehn târî olmağla menzil-i mezkûra ihdâs etdirdiği mengeneyi def‘ eylesin deyü da‘vâ edip lâkin bir vechile beyan ve isbâta kādir olamadıklarından mâ‘adâ da‘vâ-i mezkûrelerine binâen mi‘mârân-ı mezbûrân mezbûr kârhânenin mengenesine şi‘riye hamuru kodurdup ve mu‘tâd üzere işletdirdiklerinde menâzil-i mezkûreye vehn târî olacağı müte‘ayyin olmayıp ve zarârı mübeyyin dahi olmadığını mezkûr mi‘mârlar bi’l-müşâhede ihbâr etmeleriyle müdde‘iyûn-ı merkūmûn bi-gayrı vech-i şer‘î mu‘ârazadan şer‘an men‘ olunduklarını mezbûr dâ‘îleri mahâllinde tahrîr ve gelip inhâ eyledikleri bi’l-iltimâs huzûr-ı âlîlerine i‘lâm olundu. Fî 11 M sene 1180.