İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 195 Hüküm no: 166 Orijinal metin no: [80-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İvazderesi’nde binasına başlanan sed için Çataldere’den taş taşıyanlara merkep başına ücret verilmesi Bend-i cedîde moloz taş nakil eden merkebe ücret Ma‘rûz, Sâdır olan fermân-ı âlîye imtisâlen Subaşı Hasan kulları ma‘rifetiyle meclis-i şer‘-i şerîfe hâzirûn olan merkebçi tâifesinden Ortaköy’de sâkin es-Seyyid Mehmed Beyoğlu’nda sâkin es-Seyyid İbrahim ve es-Seyyid Mehmed ve Osman ve Yodok ve Artin ve Kasper ve diğer Artin ve Hasköy’de sâkin Kirkor Kemerler kurbünde İvaz Deresi’nde binâsına mübâşeret olunan bende bin üç yüz yirmi zirâ‘ misâha olunan Çataldere nâm mahâlden her bir kantara beş çeki olmak üzere tahmîl ve nakil eylediğimiz moloz taşları için her bir merkebe bir buçuk akçe ücrete her biri râzılar olup ve ücret-i mezkûre ile zikr olunan taşları mahâll-i merkūmdan bend-i mezkûra nakle ta‘ahhüd ve hitâm-ı maslahata dek hizmet-i mezkûrenin itmâmına birbirlerine kefil, onlara dahi mezbûr subaşı kefil olmağla kefâletleri tescîl olunduğu ber-mûceb-i fermân-ı âlî huzûr-ı âlîlerine i‘lâm olundu. Fî 14 Muharrem sene [11]80.