İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 195 Hüküm no: 167 Orijinal metin no: [80-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tekfursarayı’nda iskân olunan Şişeci esnafının yerlerinden memnun oldukları Şîşeci Ma‘rûz, Bu def‘a sâdır olan fermân-ı âlîye imtisâlen Tekfursarayı’nda olan bi’l-cümle şişeci ustaları kapıkethüdâsı es-Seyyid Mustafa kulları ma‘rifetiyle meclis-i şer‘-i şerîfe ihzâr ve sûret-i mecbûriyetde saray-ı mezbûrede sâkin [81] olmaları merzî olmadığı gereği gibi gerek ehl-i İslâm ustalarına ve gerek Yahûd ustalarına ferden ferdâ tefhîm ve mâ fi’l-bâlleri istifsâr olundukda fi’l-asl Saray-ı mezbûra iskânımız bizim taleb ve arzuhâlimiz ile olup ve hâlâ kendi refâh-ı bâlimiz ve tayyib-i hâtırımız ile sâkin olup ve mahâll-i mezkûrda sâkin olmamız hakkımızda hayırlı olmağla merâhim-i aliyye-i hüsrevâneden fukarâ-yı esnâfımız Saray-ı mezbûrdan ihrâc ile iz‘âc buyrulmamak niyâzında olduğumuzu ve mukaddemâ arzuhâl eden Halil arzuhâl-i mezkûru ehlim vermiş idi ben dahi tayyib-i hâtır ve rızâm ile sâkin olurum deyü tekrâr isti‘fâ etdiğini ve eğer bu takrîrimizin hilâfına arzuhâl eder olursa esnâfımızdan değildir, ahz olunup kendüyle murâfa‘a olunmamıza müsâ‘ade olunmasını ifâde matlûbumuzdur demeleriyle taraf-ı âlîlerinden dahi istintâk için cümlesi işbu i‘lâmıyla huzûr-ı âlîlerine irsâl olundu. Ma‘lûm-ı devletleri buyruldukda emr ü fermân hazret-i men-lehü’l-emrindir. Fî 18 M sene [11]80.