İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 196 Hüküm no: 168 Orijinal metin no: [81-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yenişehirli Matatya Yahudinin Bekir b. Ramazan aleyhindeki alacak davasından men olunması Matatya nâm Yahûdîyi men‘ Ma‘rûz, Mahmiye-i İslambol’da Yeni Han’da mütemekkin Yenişehirli Matatya nâm Yahûdî arzuhâlinde ısdâr etdirdiği fermân-ı âlîye imtisâlen Çarşamba günü Arz Odası’nda huzûr-ı âlîlerinde akdolunan meclis-i şer‘-i münîrde hasmı el-Hâc Bekir b. Ramazan mahzarında mezbûr el-Hâc Bekir altmış yedi senesinde Niğbolu ve Silistre sancaklarının bedel-i nüzûl ve Celebkeşân Mukāta‘asını uhdelerinde olan mevâlî-i izâmdan Molla Hakzâde İshak Efendi ve hâcegândan İbrahim Efendi’den iltizâm etmekle mukāta‘a-i mezkûre için bi-şarti’r-rücû‘ emriyle malımdan sekiz bin guruş yedine ve yirmi altı bin guruş dahi mûmâ-ileyhimâ efendilere teslîm edip hattâ mezbûr el-Hâc Bekir altmış altı senesi Zilka‘desi gurresinde ve tekrâr altmış yedi senesi Muharremi gurresinde Yeni Han’da odamda cihet-i mezkûreden bana otuz dört bin guruş deyni olduğunu ikrâr ve işhâd dahi etmekle hâlâ mezbûr el-Hâc Bekir’den taleb ederim deyü da‘vâ mezbûr el-Hâc Bekir cevâbında bi’l-külliye inkârından mâ‘adâ sene-i merkūmede zikr olunan mukāta‘ayı müdde‘î-i merkūm Matatya ile şerîki olup bundan akdem vefât eden el-Hâc Mustafa Efendi mûmâ-ileyhimâ efendilerden iltizâm ve beni taraflarından emâneten irsâl, ben dahi mukāta‘a-i mezkûre malını tahsîl ve işbu yedimde olan tahvîller ve poliçeler mantûklarınca gerek mezbûr Mustafa Efendi’nin ve gerek işbu müdde‘î-i merkūm Matatya’nın emirleriyle ta‘yîn eyledikleri mahâllere teslîm edip hattâ işbu yedimde olup mezbûr Mustafa Efendi’nin hat ve hatemini hâvî ibrâ temessükü mantûkunca altmış sekiz senesi Muharremi’nin on beşinci günü Kasabbaşı sâbık Abdullah Ağa’nın Âşıkpaşa’da vâki‘ menzilinde mukāta‘a-i mezkûre malından yed ve zimmetimde bir akçe kalmadığını ikrâr eyledikde merkūm Matatya dahi benim zimmetimde cihet-i mezkûreden aslâ hakkı kalmadığını ikrâr ve husûs-ı mezkûra müte‘allıka da‘vâdan zimmetimi ibrâ ve iskāt etmiş idi deyü ba‘de’d-def‘ ve’l-inkâr mezbûr el-Hâc Bekir def‘-i meşrûhunu Eyüb’de Kızılmescid’de sâkin es-Seyyid Ahmed b. Mustafa ve Âşıkpaşa’da sâkin İbrahim Ağa b. Yusuf nâm kimesneleri ikāme, onlar dahi merkūm Matatya’nın vech-i meşrûh üzere ikrâr ve ibrâsına edâ-yı şehâdet-i şer‘iyye etmeleriyle mezbûrânı mahâllerinden tezkiye için kıbel-i şer‘-i şerîfden Mehmed Emin Efendi irsâl, ol dahi zikr olunan mahâllere varıp yirmi beş nefer mazbûtü’l-esâmi kimesneler udûlden olduklarını ihbâr etmeleriyle şehâdetleri şer‘an makbûle olmağın mûcebiyle merkūm Matatya Yahûdî meblağ-ı merkūm otuz dört bin guruş mutâlebesiyle şer‘an mu‘ârazadan men‘ iktizâ eylediği mübâşiri İbrahim Çavuş kulları yediyle bi’l-iltimâs huzûr-ı âlîlerine i‘lâm olundu. Fî 18 Muharrem sene [11]80.