İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 197 Hüküm no: 169 Orijinal metin no: [81-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa’ya bakır bedelinden olan borcunu ödemesi hususunda Bakırcılar Kethüdası Mustafa’ya tenbihte bulunulması İki yüz seksen vakiye nühâs semeni hüküm. Ma‘rûz, Mahmiye-i İslambol’da Kaliçeciler köşkünde sâkin olup hâlâ Selanik vâlisi hizmetinde olan Osman Ağa b. Mehmed nâm kimesne tarafından vech-i âtî üzere da‘vâ ve kabza vekîl olduğu ber-nehc-i şer‘î sâbit olan mu‘arrefetü’z-zât zevcesi Ümmügülsüm bt. Mehmed nâm hatun Çarşamba günü arz odasında huzûr-ı âlîlerinde ma‘kūd meclis-i şer‘-i hatîrde Bakırcılar kethüdâsı [82] arzuhâlde mezkûr el-Hâc Mustafa b. Süleyman mahzarında müvekkilim zevcim mezbûr Osman’ın Sultân Bâyezid’de Bakırcılar sûkunda vâki‘ dükkânında malı olan her kıyyesi birer guruş kıymetli üç yüz yirmi sekiz vakiye evânî-i nühâsını zevcim mezbûr vezn edip işbu hâzır bi’l-meclis Yorgi nâm zimmîye teslîm ve bi’l-icâre dükkân-ı merkūmda ikāmet etdirip lâkin zimmî-yi merkūm medyûn olmağla zikr [olunan] bakırların kırk sekiz vakiyesini izâ‘at edip bâkī iki yüz seksen vakiyesini dahi izâ‘at eder havfıyla yedinden nez‘ ve ba‘de’l-vezn işbu mezbûr kethüdâya îdâ‘ ve teslîm ve istihfâz ve hattâ dükkân-ı merkūmun miftâhını dahi verdiğimizde ol dahi kabûl edip yetmiş dokuz Şevvâli’nin on beşinci günü mahâll-i mezkûrda kendi dükkânında ol mikdâr bakırı benden istîdâ‘ ve tesellüm eylediğini ikrâr ve işhâd dahi etmiş iken zimmî-yi merkūmun malı olmak zu‘muyla dâyinlerine teslîmle istihlâk etmeğin kıymet-i mezkûresi birer guruşu mezbûr el-Hâc Mustafa’dan tazmîn olunmak bi’l-vekâle matlûbumdur deyü ba‘de’d-da‘vâ ve’l-inkâr müdde‘iye-i mezbûre merkūm kethüdânın ikrâr-ı meşrûhuna Küçük Karaman’da Attâr Molla Mustafa b. Hüseyin nâm kimesneyi dâ‘îhânede iki gün mukaddem ikāme etmekle şâhid-i âharı olan Lütfü Paşa’da sâkin Sarrâc Mehmed b. Ali nâm kimesneyi dahi ikāme edip nisâb-ı şehâdet tamâm olmağla mahâllerinden dahi tezkiye olunup şehâdetleri makbûle olmağın mûcebiyle iki yüz seksen vakiye nühâsın kıymetin edâsına mezbûr Kethüdâ el-Hâc Mustafa’ya tenbîh-i şer‘î olunduğu es-Seyyid Mehmed Çavuş kulları iltimâsıyla huzûr-ı âlîlerine i‘lâm olundu. Fî 18 Muharrem sene [11]80.