İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 198 Hüküm no: 170 Orijinal metin no: [82-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali’nin simitci fırını gediği kirasına dair İbrahim ve ortakları aleyhindeki alacak davasında anlaşma sağlanması Simit, simidçi dükkânı gediği kirâsı da‘vâsı Ma‘rûz, Sâhib-i arzuhâl İbrahim Çarşamba günü Dîvân-ı âlîde ma‘kūd meclis-i şer‘-i münîrde arzuhâlde mezkûr es-Seyyid el-Hâc Ali ile terâfu‘larında mezbûr el-Hâc Ali Küçükpazar’da vâki‘ Fâtıma nâm hatundan isticâr eylediği simidçi dükkânında mevcûd gedik ta‘bîr olunur âlât-ı ma‘lûmesini her şehr on altışar guruş icâre kavliyle mezbûr İbrahim ve şerîkleri Ali ve Abdurrahman’a icâr ve on guruşunu mezbûre Fâtıma’ya havâle, onlar dahi bu vechile kabûl ve on bir aydan beri âlât-ı mezkûreyi isti‘mâl eylediklerini Kethüdâ Osman ve Yazıcı Süleyman nâm kimesneler şehâdetleriyle ba‘de’l-isbât mezbûrûn zimmetlerinde dakīk semeninden iddi‘â eylediği yüz kırk buçuk guruş bâ-vesâtet-i Müslimîn yüz on guruş bedel-i makbûz mukābelesinde mezbûrûn ile sulh olup ziyâde otuz buçuk guruşdan mezbûrûnun zimmetlerini ibrâ etdikde mezbûr İbrahim dahi icâre-i mezkûreye ve fırın-ı mezkûrun ta‘mîrine malımdan sarf eyledim deyü iddi‘â eylediği seksen guruşa müte‘allıka da‘vâdan mezbûr el-Hâc Ali’nin zimmetini ibrâ edip her biri ibrâyı kabûl ve kat‘-ı münâza‘a eyledikleri tescîl olunup bi’l-iltimâs huzûr-ı âlîlerine i‘lâm olundu. Fî 18 Muharrem sene [11]80.