İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 202 Hüküm no: 178 Orijinal metin no: [84-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Mehmed ile Nalband Halil Çelebi’nin birbirlerinin evlerine olan zararlarını gidermeyi taahhüt etmeleri Ortakapısı dâhilinde keşif Ma‘rûz, Sâdır olan fermân-ı âlîlerine imtisâlen savb-ı şer‘-i şerîf-i enverden irsâl olunan keşif nâibimiz müderrisîn-i kirâmdan es-Seyyid Halil Efendi dâ‘îleri Hâssa mi‘mârlarından Abdullah ve Osman Halîfeler ve sâir ümenâ-yı şer‘le mahmiye-i İstanbul’da Ortakapısı dâhilinde Neslişah Sultân mahâllesi avârız vakfından mahâlle-i mezbûrede vâki‘ sâhib-i arzuhâl el-Hâc Ahmed b. Mehmed’in tasarrufunda olan menzile varıp huzûr-ı Müslimînde akdeylediği meclis-i şer‘-i şerîfde arzuhâlde mezkûr Na‘alband Halil Çelebi b. Hasan’ın mezbûr el-Hâc Ahmed’in menzili süflâsından evvel binâ eylediği [85] müşârün-ileyhâ Neslişah Sultân Vakfı’ndan olan menzilinin dîvânhâne ve dehlizin pencerelerinden mezbûr el-Hâc Ahmed’in menzil-i süflâsının makarr-ı nisvân olan oda ve sofalarına havâlesi olup ve mezbûr el-Hâc Ahmed’in bu esnâda binâ eylediği fevkānî dehliz camlarından mezkûr Halil Çelebi’nin zikr olunan dîvânhâne ve dehlizlerine havâlesi olduğu ba‘de’l-mu‘âyene mezkûr Halil Çelebi’nin kendi duvarı üzerinden tahta perde ile havâlesini def‘e ta‘ahhüd eyledikde mezbûr el-Hâc [Ahmed] dahi kezâlik tahta perde ile kendi percereleri önünden lâzım gelen havâlesini def‘e ta‘ahhüdünden sonra mezkûr Halil Çelebi’nin mezbûr el-Hâc Ahmed menzili tarafında müceddeden binâ eylediği taş duvarda bi-gayrı hakkın vaz‘ eylediği seyl mecrâsını sed ile mezbûr Halil’e tenbîh olunduğu mezbûr dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 17 M sene [1]180.