İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 203 Hüküm no: 179 Orijinal metin no: [85-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kemhacı Mehmed Ağa Vakfı’ndan olup, Fatıma’nın sakin olduğu harab menzilin tamirine izin verilmesi Kocamustafapaşa kurbünde keşif Ma‘rûz Sâdır olan fermân-ı âlîlerine imtisâlen kıbel-i şer‘-i şerîf-i enverden irsâl olunan keşif nâibimiz müderrisîn-i kirâmdan es-Seyyid Halil Efendi dâ‘îleri hâssa mi‘mârlarından Abdullah ve Mustafa halîfeler ve sâir ümenâ-yı şer‘le mahmiye-i İstanbul’da Kocamustafapaşa Câmi‘-i şerîfi kurbünde Duhânîzâde Mustafa Bey mahâllesinde vâki‘ bir tarafdan el-Hâc Evhad Vakfı’ndan olan menâzil ve bir tarafdan ba‘zan Muhzır İbrahim Çelebi ve ba‘zan Süleyman Efendi ve ba‘zan Ma‘den Halîfesi Ahmed Efendi ve ba‘zan Kâtib Mehmed Efendi menzilleri ve bir tarafdan el-Hâc Süleyman menzili ve taraf-ı râbi‘i tarîk-i âm ile mahdûd Kemhacıbaşı Mehmed Ağa nâm kimesnenin süknâsını evlâd ve evlâd ve evlâd ve utekāsına şart eylediği müşrif-i harâb olan bir bâb menzile varıp akdeylediği meclis-i şer‘-i hatîrde menzil-i mezbûr civârında menzile mutasarrıf olan mezbûr el-Hâc Süleyman nâm kimesne sâhib-i arzuhâl Feyzullah’ın zevcesi evlâd-ı utekādan menzil-i mezbûra hâlâ vâzı‘atü’l-yed olan Fâtıma bt. Mehmed muvâcehesinde mezbûre Fâtıma’nın işbu meşrûtiyet üzere sâkine olduğu menzilin ba‘zı mahâlleri benim menzilim tarafına münhedim ve ba‘zı mahâlleri dahi inhidâma mâil olmağın zarârı def‘ olunmak matlûbumdur dedikde, mi‘mârân-ı merkūmân vech-i meşrûh üzere zarârı olduğunu ba‘de’l-mu‘âyene ve’l-ihbâr mezbûre Fâtıma merkūm el-Hâc Süleyman’ın zarârını def‘a ta‘ahhüdünden sonra hâlâ ber-vech-i meşrûta sâkine olduğu menzil-i mezbûr bir vechile kābil-i süknâ olmayıp yine kendi enkāzıyla kābil-i süknâ olacak vechile ta‘mîr eylemek üzere izin verilmek matlûbumdur dedikde harâb olan mahâllerinden menzil-i mezkûrun nısf mertebesi hedm olunur ise enkāzıyla nısf-ı âharı ancak ta‘mîr olunur, noksân ile olmaz deyü mi‘mârân-ı mezbûrân ittifâk ve ihbâr eylediklerini mezbûr dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 13 M sene [1]180.