İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 204 Hüküm no: 181 Orijinal metin no: [86-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cağalzade Vakfı’ndan Fatıma Hatun’un sahibi bulunduğu menzilin depremden zarar gören kısımlarının yıkılması Kabasakal kurbünde keşif Ma‘rûz, Kabasakal mahâllesi ahâlîsinin iştikâ ve arzuhâlleriyle sâdır olan fermân-ı âlîlerine imtisâlen kıbel-i şer‘-i şerîfden Mehmed Emin Efendi dâ‘îleri irsâl, ol dahi hâssa mi‘mârlarından Ahmed Halîfe ve sâir ümenâ-yı şer‘le mahâlle-i mezbûrede vâki‘ merhûme Âişe Sultân odaları demekle ma‘rûf odaların derûnunda bir tarafdan Za‘îm Ömer Ağa kerîmesi menzili ve bir tarafdan Fâtıma bt. Abdullah menzili ve iki tarafdan tarîk-i hâs ile mahdûd Cağalazâde Vakfı’ndan Fâtıma bt. Berber Mustafa’nın tasarrufunda olan menziline varıp mu‘âyene eylediklerinde menzil-i mezkûrun köşesinde vâki‘ iki zirâ‘ kadli taş amûd üzerinde sekiz zirâ‘ kadli taş duvar ve matbâh ocağı tarîk-i hâssa zelzeleden mâil olmağla mürûr edenlere zarârı müte‘ayyen olmağla zikr olunan duvar ve ocağın hedmi muktezî olduğunu zevci vesâtetiyle mezbûre Fâtıma’ya tenbîh eylediklerini mezbûr dâ‘îleri mahâllinde ketb ü tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 21 Zilhicceti’ş-şerîfe sene 1179.