İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 205 Hüküm no: 182 Orijinal metin no: [86-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Firari Mustafa Paşazade Süleyman’ın tasarrufunda olan sarayın depremden zarar gören kısımlarının yıkılması Dizdariye kurbünde keşif Ma‘rûz, Mahmiye-i İslambol’da Dizdariye mahâllesi ahâlîsinin iştikâ ve arzuhâlleriyle sâdır olan fermân-ı âlîlerine imtisâlen kıbel-i şer‘-i şerîfden Mehmed Emin Efendi dâ‘îleri irsâl, ol dahi Hâssa mi‘mârlarından Hasan ve Seyyid Mustafa Halîfeler ve sâir ümenâ-yı şer‘le mahâlle-i mezbûrede vâki‘ Uzun Şücâ‘ ve Sinan Paşa ve Alipaşa-i atik Vakıflarından merhûm Firârî Mustafa Paşazâde Süleyman Bey nâm sagīrin tasarrufunda olan sarayın dâhiliyesinde sed üzerinde vâki‘ taş odaya muttasıl kenîf ve köşk ve selsebîl ve bahçe duvarları vukū‘ bulan zelzeleden münşak olduğu mu‘âyene oldukdan sonra ittisâlinde mevcûd Alipaşa-i atîk Vakfı’ndan Şerîf Paşa vârisleri ve Ömer Ağa ve Seyyid Yusuf Çelebi ve Hadîce Hatun ve Gömleksiz Odaları demekle ma‘rûf odalarda Berber Mehmed ve Bezzâzistânî el-Hâc Mehmed Hasan ve tarîk-i hâs ve Hadîce Usta ve Berber İbrahim menzilleri üzerine inhidâma meyli olup hedm olunmadığı takdîrce yıkılıp menâzil-i mezkûreyi dahi yıkıp ızrâr edeceği müte‘ayyen olmağla bu makūle ebniyenin hedmi için sâdır olan fermân-ı âlîşân mûcebince sagīr-i mezbûrun vasîsi İbrahim Bey dahi zikr olunan mahâlleri hedm ile zarârı def‘e ta‘ahhüd eylediğini mezbûr dâ‘îleri mahâllinde ba‘de’t-tahrîr ve’l-inhâ bi’l-iltimâs huzûr-ı âlîlerine i‘lâm olundu. Bâkī emr ü fermân hazret-i veliyyü’l-emrindir. Fî 21 Zilhicceti’ş-şerîfe sene 1179.