İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 205 Hüküm no: 183 Orijinal metin no: [86-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeni Cami avlusu çeyrekçi esnafından Mustafa’nın Seddülbahir kalesinde hapsedilmesi Çeyrekçilerden Seddülbahr kal‘asına Ma‘rûz, Hâlâ Kasabbaşı Ali Ağa ve Kasablar Kethüdâsı Mehmed kulları ve kasab ustalarından el-Hâc Mehmed ve Osman Çelebi ve diğer el-Hâc Mehmed ve el-Hâc Abdi ve çeyrekçi ustalarından es-Seyyid Mustafa ve İsmail ve Hasan Yeni Câmi‘-i şerîf havlusu çeyrekçilerinden Mustafa b. Salih nâm kimesneyi meclis-i şer‘-i şerîfe ihzâr ve muvâcehesinde bâ-fermân-ı âlî nizâmımız Âsitâne’ye gelen koyunların her sürüsünden mahâllinde cümle ihtiyâr ustalar ve kasab başılar ma‘rifetiyle çaşni tutulup kimesneye gadr ve himâye olmaksızın her tarafın hisseleri verilegelip düstûrü’l-amel iken mezbûr Mustafa kendi hâlinde olmayıp nizâm-ı mezkûru bozmak ve kendi celb-i menfa‘ati irâdesiyle üç gün mukaddem iki yüz re’s Rumeli tarafından gelip tevzî‘a idhâl olunacak koyunları başlı başına müstakillen sâhibinden iştirâ ve kendi zu‘muyla çeyrekçilere tevzî‘ eylediğini bu gün ikrâr etmiş iken işbu meclis-i şer‘de inkâr eylediğinden mâ‘adâ cümle ustalara ve fermân-ı âlîşâna bir vechile itâ‘ati yokdur ve bu sû-i hâlini ihbâr ve te’dîb ve inkiyâd için mezbûr Mustafa izzetlü Yeniçeri Ağası ma‘rifetiyle Seddülbahr Kal‘ası’na vaz‘ olunmak bâbında fermân-ı âlîleri sudûrunu istid‘â eyledikleri iltimâslarıyla huzûr-ı âlîlerine i‘lâm olundu. Bâkī emr ü fermân hazret-i veliyyü’l-emrindir. Fî 23 Muharrem sene 1180.