İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 206 Hüküm no: 185 Orijinal metin no: [87-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mağrib eşyası satan esnafın Galatalı ve İstanbullu olarak iki fırkaya ayrılması ve kethüda tayinleri Mağrib metâ‘ı fürûht eden esnâf nizâmı Ma‘rûz, Mağrib metâ‘ı fürûht eden tâifenin bundan akdem kethüdâsı olan Çerbini? Süleyman’ın şer‘an ta‘zîri mûcib ef‘âl-i şenî‘ası ale’n-nehci’ş-şer‘i’ş-şerîf sâbit ve mütehakkık olduğundan ref‘i lâzım geldikde mezbûr Süleyman’dan teşekkî eden Galata ve İslambol’da sâkin Tunus ve Trablus ve Cezâyirli olan fırka ile mezbûr Süleyman’ın tarafgîrleri beyninde ittihâd ile bir kethüdâ ihtiyâr etmeleri mümkün olmamağla bundan akdem mesbûk olduğu vech üzere fermân-ı âlîlerine imtisâlen mezbûr Tunuslular ekser Galata sükkânından olmağla Galatalı ve İstanbullu ta‘bîriyle beynleri temyîz kılınan fırkateynin Galatalı ta‘bîr olunup merkūm Süleyman ve teba‘asından teşekkî eyleyen otuz dört aded dükkân sâhibleri ve yine onlara tâbi‘ Torbacı ta‘bîr olunan otuz dokuz nefer kimesneler içlerinden el-Hâc Ömer b. Mehmed nâm kimesneyi ihtiyâr ve İslambollu tesmiye olunan elli bir aded dükkân sâhibleri ve Torbacıları el-Hâc Yahya b. Mehmed’i kethüdâlığa ihtiyâr ve kabûl edip ve bundan akdem i‘lâm olunduğu vech üzere mağribden gelen fes ve şal ve kuşak ve ihrâmını iki tarafın kethüdâları ve yiğitbaşıları ve ihtiyârları ma‘rifetleriyle pazar ve iştirâ ve onu on bir fâideden ziyâde ile ibâdullaha bey‘ etmemek üzere ta‘ahhüd ve tevzî‘ ve taksîmde birbirlerinin sihâmına müdâhale ve gadr ve himâye ve hilâf-ı şer‘-i şerîf falaka ve değnek ile esnâfını kethüdâları ve yiğitbaşıları darb ve rencîde etmeyip iktizâ eden ta‘zîr-i şer‘îleri İslambol Mahkemesi’nde ba‘de’s-sübût icrâ olunup ve hilâf-ı nizâm hareketleri olup esnâfından tard yâhud te’dîb iktizâ eder ise kezâlik İslambol Mahkemesi’nde fırkateyn kethüdâlar muvâcehelerinde görülüp mûcebince icrâ olunmak ve bundan sonra birbirlerinin kethüdâlığına ve sâir umûrlarına hilâf-ı şer‘-i şerîf ve mugāyir-i emr-i münîf dahl ü ta‘arruz ederi olur ise devâm-ı nizâmları için hırfetlerinden ihrâc ve vatan-ı aslîlerine nefy ile iz‘âc olunmak üzere mezbûr Ömeri ve Yahya’yı fırkalarına kethüdâ nasb ü ta‘yîn ve işbu şurût-ı nizâmları Başmuhâsebe’ye kayd ve yedlerine başka başka berat-ı âlîşân ihsân buyrulmak bâbında emr ü fermân hazret-i men lehü’l-emrindir. Fî 17 Muharrem sene 1180.