İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 207 Hüküm no: 186 Orijinal metin no: [87-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbetçi esnafından David ve Yoda’nın, esnafa ait Frenk şekeri taksimi ve sair hususlara karışmayacaklarına dair taahhütte bulunmaları Frenk şekeri nizâmı Ma‘rûz, Derûn-ı arzuhâlde mezkûr şerbetçi tâifesinden David v. Avram ve Yoda v. İsak nâm Yahûdîler meclis-i şer‘-i hatîrde Mısır Çarşısı ahâlîsinden ashâb-ı arzuhâl kethüdâları es-Seyyid Mehmed ve Yiğitbaşıları Molla İsmail ve ustalarından el-Hâc İbrahim ve el-Hâc Ali ve Yusuf ve Molla Ahmed ve Halil ve Mehmed ve diğer el-Hâc Ali ile Şerbetçiler Kethüdâsı el-Hâc Ali ve yiğitbaşıları Ahmed ve ustalarından Mustafa ve Musa ve Yusuf muvâcehelerinde esnâf-ı mezkûrenin hatt-ı hümâyûn-ı inâyet-makrûn ile nizâmı taşradan gelen Frenk şekeri altı sehim i‘tibârıyla üç buçuk sehmini attârân ve iki buçuk sehmini şerbetçi ve akīdeci almak üzere düstûrü’l-amel iken bizim için şerbetçiler tarafından şeker tüccârı olan Galata’da Frenk odasına hufyeten varıp ve noksân baha ile pazarını kat‘ ve ba‘dehû esnâf-ı mezkûre vardıklarında semen-i gālî ile miyâncılık ve simsârlık edip bize gadr ve beynimize ilkā-yı fesâd ve şekerin bahasının ziyâde olmasına bâ‘is oldular deyü teşekkî etmeleriyle sekiz gün mukaddem şerbetçiler esnâfı ile biz Mahmudpaşa Mahkemesi’ne varıp fî-mâ-ba‘d kendi hâlimizde olup bu misillü umûrlarına karışmamak üzere mu‘âhedemiz sebk ve i‘lâm olunmuş idi. Hâlâ ahd-i sâbıkımız üzere Frenk odasına şeker pazarı için aslâ varmayıp [88] ve umûr-ı esnâf-ı selâse-i mezkûreye bir vechile karışmamak üzere tekrâr ta‘ahhüd ve eğer hilâfına hareket edersek te’dîben küreğe vaz‘ olunmağa râzı olmamız ile takrîrimiz tescîl olunup i‘lâm olunmak matlûbumuzdur deyü takrîr ve te’mînlerini esnâf-ı mezkûre tasdîk eyledikleri iltimâslarıyla huzûr-ı âlîlerine i‘lâm olundu. Fî 14 Muharrem sene 1180.