İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 217 Hüküm no: 202 Orijinal metin no: [93-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Şerbetçi Poyraz Mehmed’in varislerinin şerbethane gediği hisselerini Hasan Ağa’ya kiraya vermeleri Şerbetçi Poyraz vârisleri Ma‘rûz, Mahmiye-i İslambol’da Lâleliçeşme kurbünde Mesihpaşa mahâllesinde bundan akdem fevt olan Şerbetçi Poyraz Mehmed nâm kimesnenin zevcesi ve sagīr oğlu İbrahim’in vasîsi olan zâtı mu‘arrefe Hadîce bt. el-Hâc Mustafa meclis-i şer‘-i hatîrde zikr olunan Lâleliçeşmesi kurbünde vâki‘ Şerbetçi dükkânında mevcûd gedik ta‘bîr olunur şerbetçi âlâtının nısfı müteveffâ-yı mezbûrun mülkü ve ba‘de-vefâtihî mezbûrâna mevrûs olup ve nısf-ı şâyi‘-i âharına mâlik olan Şerbetçi Hasan Ağa b. Abdullah mahzarında âlât-ı mezkûrenin nısf-ı şâyi‘i bundan akdem her şehr on ikişer guruş icâre ile mezbûr Hasan Ağa’nın taht-ı icâresinde iken mezbûr Hasan Ağa fesh-i icâre edip icâresini edâda mümâtale eder deyü da‘vâ ve nizâ‘ etmeleriyle şerbetçiler kethüdâsı ve ustaları ma‘rifetleriyle beynleri tevfîk olunup fîmâ-ba‘d şuhûr-ı ma‘lûme tamâmına dek her şehr on bir guruş icâre ile vasiyy-i mezbûra âlât-ı mezkûrenin nısf-ı şâyi‘ini şerîkler mezbûr Hasan Ağa’ya icâr etdikde ol dahi isticâr ve kabûl ve bu minvâl üzere kat‘-ı nizâ‘ eyledikleri tescîl olunup bi’l-iltimâs huzûr-ı âlîlerine i‘lâm olundu. Fî 3 Saferi’l-hayr sene 1180.