İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 217 Hüküm no: 203 Orijinal metin no: [93-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lupan, Piço ve Rado’nun sadece Kuşbazlar Fırını ekmekçisi Minas’ın ekmeklerini satacaklarına dair taahhütte bulunmaları Kuşbazlar fırını tablakârı Ma‘rûz, Testereciler başında Kuşbazlar Fırını ekmekçisi arzuhâl eden Minas tablakâr tâifesinden meclis-i şer‘-i şerîfe ihzâr eylediği arzuhâlde mezkûr Lupan ve Piço ve Rado nâm zimmîlerden merkūmûn fırın-ı mezkûrda tablakârlarım olup kaldırdıkları ekmeği derkenârda mezkûr olduğu vech üzere merkūmân Lupan ve Piço Irgadpazarı’nda bayat dükkânı karşısında vâki‘ iskemlede ve merkūm Rado Düğmeciler kapısı kurbünde bey‘ edegelmiş iken merkūmûn âhar fırınlardan ekmek kaldırıp mugāyir-i nizâm mahâll-i mezkûrda ekmek bey‘ ederler deyü teşekkî, onlar dahi fîmâ-ba‘d âhar fırından ekmek kaldırmayıp tablakârı oldukları merkūm Minas’ın fırınından kaldırıp kadîmîsi üzere mahâlleyn-i mezkûreynde bey‘ etmek üzere ta‘ahhüd ve kat‘-ı nizâ‘ eyledikleri iltimâslarıyla huzûr-ı âlîlerine i‘lâm olundu. Fî 3 Saferi’l-hayr sene [11]80.