.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 112
Hüküm no: 113
Orijinal metin no: [17b-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Ali b. el-Hâc Bayram’ın vârislerinin haklarını alarak birbirlerinin zimmetini ibra ettikleri

Gıbbe’t-taleb ve’l-iltimâs cânib-i şer‘-i kaviyyü’l-intisâbımdan irsâl olunan mevlânâ Abdulkādir Efendi mahmiye-i İstanbul’da Timurtaş Mahallesi’nde Ali b. el-Hâc Bayram nâm müteveffâdan vech-i âtî üzere veresesine intikāl eden menzile varıp zeyl-i kitâbda mastûrü’l-esâmî olan Müslimîn huzûrlarında akd-i meclis-i şer‘-i şerîf eyledikde, meclis-i mezbûrda müteveffâ-i merkūm Ali’nin verâseti zevcesi Alime bt. Hüseyin nâm hatun ile sulbî kebîr oğulları Ahmed ve Süleyman ve Hüseyin’e münhasıra olup kable’l-kısmet mezbûr Ahmed dahi fevt olup verâseti vâlidesi mezbûre Alime’ye ve li-ebeveyn karındaşlar merkūmân Süleyman ve Hüseyin’e münhasıra olup bi-hükmi’l-münâsaha tashîh mes’ele olan iki yüz seksen sekiz sehmden mezbûre Alime’ye elli sehmi ve yüz on dokuz sehmi mezbûrân Süleyman ve Hüseyin’e isâbet eylediği şer‘an müte‘ayyen ve mütebeyyen oldukdan sonra mezbûrûndan her biri yine meclis-i mezbûrda takrîr-i kelâm ve bast-ı merâm edip mûrisimiz müteveffâ-i evvel merkūm Ali’den bi-tarîkı’l-münâsaha bize intikāl eden işbu menzil-i mevrûsumuzu gāib ani’l-meclis Bostancı el-Hâc Mustafa nâm kimesneye yüz yetmiş bin iki yüz seksen sekiz akçeye bâtten bey‘ ve teslîm edip kabz-ı semen eylemişdik. Hâlâ semen-i mezbûr alâ-mâ farazallâhu te‘âlâ beynimizde taksîm ve herbirimiz hisse-i şer‘iyyelerimizi ahz u kabz etmek murâd ederiz deyip semen-i mezbûru meclis-i merkūma getirip huzûr-ı Müslimînde addeylediklerinde yüz yetmiş beş bin iki yüz seksen sekiz akçe mevcûd olup meblağ-ı mezbûrdan on altı bin akçesi mezbûre Alime’nin mehr-i müeccel-i müşebbi‘ası içün ihrâc ve mezbûrân Süleyman ve Hüseyin ma‘rifetleri ile yedine teslîm olunup ol dahi tesellüm edip bâkī kalan yüz elli dört bin iki yüz seksen sekiz akçeden sihâm-ı mezbûre mukābelesinde merkūme Alime’ye yirmi altı bin yedi yüz elli akçe ve mezbûr Süleyman’a altmış üç bin altı yüz altmış beş akçe ve mezbûr Hüseyin’e dahi altmış üç bin altı yüz altmış beş akçe isâbet edip ba‘dehû her biri sihâm-ı mezbûre mukābelesinde meblağ-ı mezbûrdan vech-i meşrûh üzere isâbet eden haklarını bi’t-tamam ve’l-kemâl ahz u kabz eyleyip meblağ-ı mezbûra müte‘allika da‘vâ ve mutâlebe ve eymân ve muhâsamadan âharın zimmetini ibrâ-i âmm-ı kātı‘u’n-nizâ‘ ile ibrâ ve ıskāt ettiklerinden sonra vâki‘ hâli mevlânâ-yı mezbûr mahallinde tahrîr, ba‘dehû cânib-i şer‘den ma‘an irsâl olunan Ali Bey b. Mehmed ve Hasan Çelebi b. Kanber ile gelip herbiri vukū‘u üzere inhâ ve takrîr etmeğin mâ-hüve’l-vâki‘ gıbbe’t-taleb ketb ü terkīm ve yedlerine def‘ ve teslîm olundu ki inde misâsi’l-hâce ihticâc edineler, cerâ zâlik.

Ve hurrire fi’l-yevmi’t-tâsi‘ ve’l-ışrîn min-Şevvâli’l-mükerrem li-sene selâse ve sittin ve elf.

Şuhûdü’l-hâl: Şa‘ban Halîfe b. Mustafa el-müezzin, İbrahim Çelebi b. Nasuh el-Mütevellî, el-Hâc Mustafa b. Hasan, Mehmed Çelebi b. el-Hâc Mustafa, el-Hâc Sefer b. Ahmed, Abdal b. Mehmed, Süleyman Çelebi b. Mehmed, Mehmed Beşe b. Mustafa, Mehmed Beşe b. Süleyman ve gayruhum mine’l-huzzâr.